Salmos 94 - Chuj San Sebastian Bible

SALMO 94 A Jehová Juez yaji

¹ Mamin Jehová ch'oxl a b'a to Dios ach, ach tzac' spac tas maysch'olnil.

² Juez ach 'a yolyib'n̈q'uinl tic, ch'oxl a b'a 'a eb' tzyij chan̈ sb'a, tza'n spac yic eb'.

³ Mamin Jehová, ¿jantcto wal tiempo tzyac' eb' maysch'olnil tic sgana?

⁴ Smasnil eb' maysch'olnil tzyutj sb'a cha, tzlaj sb'an̈ sb'a eb', tzyi'n chan̈ sb'a eb' yuj tas tzlaj sb'o'.

⁵ Caw wal tzon̈ 'ixtx an̈ a chon̈b' on̈ tic, ¿toc 'ayt tzyal eb' a chon̈b' tic 'a eb'?

⁶ Tzlaj milx cham eb' 'ix chamnc yichmil yuj eb', eb' chuc chon̈b'al yet' eb' meb'a 'unn chamnc smam.

⁷ Tzyaln eb' 'ixtic: Matz yil Jehová tas tzqui b'o'ec, man̈ yojcoc sDiosal Jacob, xchi eb'.

⁸ 'Ab'c ex wit chon̈ab', caw may e nab'en, caw pit ex. ¿B'a'n̈ to wal 'oj nachjoc 'el eyu'uj?

⁹ ¿Am wal e nani, to a mach b'ojnac qui chicnec matz yab' tas tzcalec? ¿am e nani, to a mach b'ojnac yol qui satec, matz yil tas tzqui b'o'ec?

¹⁰ ¿Am wal e nani, to ma'oj ya'ch yailal 'a eyib'an̈? ¿Tom man̈ yojcoc Dios tze na'a? 'In to a tzon̈ cuynec yic tzcojcanec 'el jelnal, tzya'n pax cuenta eb' lum niwc nacion̈.

¹¹ A Jehová yojc wal si'mb'il to an̈ 'anman̈ec tic, cojn wal man̈ nab'enal tzqui na'ec.

¹² Mamin Jehová, caw wach' yic eb' to ach tza' cuenta, tza'n pax yojcoc 'el eb' a cuynb'il,

¹³ sec may tas tzna eb' yic tzjaw stiempoal cusc'ojlal, ya' sb'a tza b'o lum jul 'aj tz'atcn eb' tzb'on maysch'olnil.

¹⁴ Ma'oj actc can eb' a chon̈b' tic sch'ocoj.

¹⁵ A tojlal 'oj yic' yip jun 'ejm xo. Smasnil eb' 'anma wach' snab'en, 'oj ya'ch eb' yipc sc'ojl jun tojlal cha.

¹⁶ Mamin, ¿mach wal junc in wul colnc 'el 'a yol sc'ab' eb' maysch'olnil cha, mto 'a eb' tu snab'en 'a in patquil?

¹⁷ Q'uinloc ma'in a col Mamin Jehová, toto 'ixta', pectix am sictac waj in chami.

¹⁸ 'Ay jun tiempoal xwal 'ixtic: Caw wal 'ijn tzin telw 'ejm tzwab'i, xin chi, palta yuj a chamc'ojlal Mamin, xin wul a colni.

¹⁹ A yic til wal tas tzin na'a, ata tzac' pax in tzaljc'ojlal, tzin a'n pax niwnc'ojlal.

²⁰ Ach tic Mamin, matz a nib'j to junn̈j aj yet' eb' yajl to maysch'olnil tzyutj yiln yopiso. Man̈ wach'c tzyutj eb' sb'on yaj junc tas 'icha yaln ley.

²¹ Tu tas tzna eb' 'a spatquil eb' tojl snab'en, tzlaj ya'nc 'och eb' chaml 'a yib'n̈ eb' may smul.

²² Palta an xo tic, in Colmal aji, in Diosal ach, a 'aych tzwa'ch in nab'en.

²³ Mamin Jehová, ach wal 'oj 'ac' meltzjoc 'och smul eb' chi 'a 'a, ax slajw 'el eb' o'oj. Ach qui Diosal on̈, ach 'oj a satl eb'.