Salmos 92 - Chuj San Sebastian Bible

SALMO 92 Alj wach' paxti 'a Dios

B'it yic sc'ul 'iljelal

¹ Mamin Jehová, til wal sja'l caln wach' paxti 'aych on̈; tzqui b'itnan pax a b'i on̈, tzqui'n chan̈ a b'i yujto caw niwn el'chi.

² A 'a junjn sq'uin̈b'ial yet' 'a junjn 'ac'wal, til wal sja'l caln 'el yab'xil a chamc'ojlal yet' 'a tojlal on̈.

³ Til wal sja'l ach qui b'itnan yet' jun tzo'n̈ son ch'an̈ 'aych 'a 'a, atn arpa yet' pax salterio.

⁴ Mamin Jehová, ach 'ix ac' in tzaljc'ojlal yet' smasnil tas b'ob'il o'oj. A jun tzo'n̈ a b'ob'en tic, a eb' tzin 'a'n 'och 'a tzaljc'ojlal.

⁵ Caw niwn yel'ch jun tzo'n̈ a b'ob'en tic, man̈x 'a mach tz'e'ch snab'en 'icha jun tzo'n̈ a nab'en tic.

⁶ A eb' 'anma may snab'en, mto eb' tz'ec' 'a yib'an̈, caw matz nachj 'el yuj eb'.

⁷ Wach'xam a eb' 'ajmul 'anma', mto eb' tzb'on maysch'olnil tzq'ue wan tzicnjoc 'icha sq'uib' te c'ultac, yajn̈j cha tz'och yip eb', palta jab' wal tiempo 'ixta tz'aj eb'. Tzlajw cha, tzsatx can 'el eb' 'a jun 'ejmn̈ej.

⁸ Ach xo tic Mamin Jehová, smasnil tiempo caw niwn el'chi.

⁹ A eb' 'ajc'ojl yajch 'ayach, 'oj satxoc can 'el eb'. Smasnil eb' tzb'on maysch'olnil, 'oj sactzic can eb'.

¹⁰ Palta ach tza'ch wip 'icha no simron wacax, ach 'ix ac' in tzaljc'ojlal.

¹¹ 'Oj wil tas wal 'oj 'aj eb' 'ajc'ojl chi slajw 'eli. 'Oj wab' wal yel yaw' eb' xb'on maysch'olnil cha.

¹² Palta ax eb' wach' snab'en, 'icha to 'oj nichnoc eb' 'icha te palma, ax sq'uib' eb' 'icha te c'ute 'a Líbano.

¹³ Yujto 'ayc' eb' 'a yamq'uil atut Mamin Jehová; wach' 'oj 'el'choc eb', yujto 'ayc' eb' 'a a stz'ey ach qui Diosal on̈.

¹⁴ Wach'xam 'ichm 'anma xo eb', palta an̈j 'ijnoc te'nto yip eb'. 'Icha junc te te tzsatni, 'ixta 'eb'.

¹⁵ 'Ixta tzyutj eb' sch'oxn 'eli to tzach ya'ch eb' yipc sc'ojol. Caw tojln̈ej a nab'en, may tu nab'enal 'ayach.