Salmos 91 - Chuj San Sebastian Bible

SALMO 91 A 'a Jehová wach' qui colnec qui b'a

¹ A eb' tzcol sb'a 'a yaln̈ spoder Jehová, atn jun caw niwn yel'chi, tztac' yuj smasnil,

² tztac' yaln eb' 'ixtc 'a 'a: Atn wal 'aych wach' qui coln qui b'a, a 'aych wach' qui c'ub'n 'el qui b'a, qui Diosal ach, 'aych 'och yipc qui c'ojol, xchi cab' eb'.

³ A Jehová 'oj qui colnec 'el 'a yol sc'ab' junc ch'an̈ yal c'ultac yaji, yet' pax 'a jun tzo'n̈ yab'il tz'och chaml yu'uj.

⁴ 'Oj on̈ sc'ub'c 'el yet' spoder, sec may tas 'oj qui'nec. 'Icha junc no caxtiln̈ tzmoy yune', 'ixta 'oj on̈ yutquec yet' spoder. 'Oj on̈ scolc 'el 'icha yaj yaln cani, 'icha tzyac' junc q'uen tzmacn sat jul-lab'.

⁵ Matz on̈ xiwc yuj tas 'ay smay tz'ec' 'a 'ac'wal, matz on̈ xiwc pax yuj jun tzon̈ jul-lab' tzsatn 'el 'anma 'a c'ual.

⁶ Matz on̈ xiwc yuj jun tzo'n̈ yab'il tzjaw 'a scal q'uic'q'uinal, matz on̈ xiwc pax yuj jun tzo'n̈ tas to tzcham 'anma yuj 'a c'ual.

⁷ Jun mil 'anma 'oj cham yuj junc chi 'a qui suritoec, ax lajn̈e mil 'oj cham 'a qui wach'ec, an̈ec xo tic, may xon tas 'oj qui'nec.

⁸ Cojn to tzqui macc quila' tas spac 'oj scha eb' tzb'on maysch'olnil.

⁹ An̈ec xo tic, a Jehová a x'och qui Colmaloquec, atn jun niwn yel'chi, a 'a wach' qui colnec qui b'a.

¹⁰ Yuj cha, may junc tas tu 'oj comn jawc 'a quib'n̈ec, ma'oj comn c'och junc yab'il 'a yol catutec.

¹¹ 'Oj ya' cot Jehová eb' yángel on̈ stan̈wquec, yaln̈ej 'aj tzon̈ 'atec.

¹² 'Oj on̈ squetzc chan̈ eb', sec man̈ comnoc tzqui tenchec coc 'a q'uen q'ue'en.

¹³ Tztac' qui b'eyc 'ec' 'a scal no león, 'a scal no niwc noc' 'ay smay yet' 'a scal no chan.

¹⁴ Yaljnac can Jehová 'ayn̈ec 'ixtic: An 'oj ex in colcn 'elt 'a yol sc'ab' smasnil tas 'ay smay, yujto tzin e chamc'ojlej, eyojquin pax si'mb'il.

¹⁵ A yic 'oj eyawj 'ayin, 'oj in ta'w 'ayex; an wal caw 'ayn 'ec' eyet'oc. 'Oj ex in col 'elt 'a scal eyailal, caw niwn yel'ch 'oj ex wutoc.

¹⁶ 'Oj wac' e q'uinl 'a najtil, ax in ch'oxn in colwal 'ayex, xchi Dios.