Salmos 90 - Chuj San Sebastian Bible

LIBRO 4 (Salmos 90—106 ) SALMO 90 A Dios 'ayc' 'a jun 'ejmn̈ej

A jun tic slesl Moisés win schecb' Dios

¹ Mamin, 'a yictax pecti', yic xlaj 'ec' jun tzo'n̈ tiempo 'a yalan̈, toxn to qui Colmal aj on̈.

² Yic mantzac a b'o eb' lum niwc witz, lum lum tic yet' smasnil yolyib'n̈q'uinl tic, masnto 'a slajub', Dios achn̈ej xoni.

³ Ach tzon̈ ac' meltzjoc can pax 'och an̈ 'anman̈ tic poccal, a yic tzaln 'a 'ayn̈ 'ixtic: Ex 'anma', meltzjan̈c can pax 'och poccal, xa chi.

⁴ A jun mil ab'il, 'ichan̈ej yec' jun c'u 'a yic 'ewi, 'ixta 'a yol a sat. 'Ichan̈ej yec' jaye'oc hora 'a junc 'ac'wal, 'ixta 'ayach.

⁵ 'Icha wal yijx 'at junc tas yuj a 'elmal a', 'ixta e'n 'ec' jab' qui q'uinl an̈ 'anman̈ tic on̈, mto 'icha junc wayich, 'ixta tzon̈ 'aj quec' on̈.

⁶ An̈ 'anman̈ tic on̈, lajn on̈ wal 'icha te c'ultac. A 'a yic sq'uin̈b'ial, caw wach' yilxi, ax yic tz'em c'u, tox xtacj pax 'el te', 'ixta caj on̈.

⁷ A yowl a c'ojl 'a quib'n̈ on̈, a chi tzon̈ satn 'el on̈, toxn̈ej tzsatcn qui c'ojl yuj on̈.

⁸ A qui mul yet' qui maysch'olnilal on̈, checln̈ej yaj 'a a sat.

⁹ A yowl a c'ojol, a tzon̈ satn 'el on̈. A jaye ab'il qui q'uinl tic on̈, lajn wal yec' 'icha tzcutj qui'n quic' jun 'ejmoc.

¹⁰ 'Ayn̈ cojn wal 70 ab'il tzquila, 'ay pax mach caw 'ay sq'uinl jun, tzq'ue'ch 'a 80 ab'il. A eb' najtl tzyila, 'icha to tzb'an̈ sb'a eb' yet' sq'uinl cha, palta caw wal ya xo yec' tiempo yuj eb', yel xo wal tzyixtj sb'a eb'. Yuj cha, 'ay mayn̈ej tz'ec' jab' qui q'uinl an̈ 'anman̈ tic on̈, tzon̈ satx can 'ejm on̈.

¹¹ ¿Tom 'ay junc mach 'ojtnac jantc wal yipl yowl a c'ojol? ¿Toc cojc on̈ jantc wal smay a c'a'lc'ojlal cha?

¹² 'A' cojcoc 'el on̈, to jab' wal qui q'uinl tic on̈, sec tzqui b'eylb'ej jelnal on̈.

¹³ Mamin Jehová, ¡colwjan̈ pax quet' on̈! ¿Jantc to wal tiempo 'oj 'ec' o'oj? 'O'ch cab' wal a c'ojl 'ayn̈ a checb' on̈ tic on̈.

¹⁴ Caw 'ay a chamc'ojlal 'ayn̈ on̈. 'A junjn sq'uin̈b'ial tza'n qui tzaljc'ojlal on̈. Yuj a chamc'ojlal cha, ax qui b'itn 'a tzaljc'ojlal, ya' sb'a pitzn on̈ to jac xo.

¹⁵ Tzqui nib'j on̈ to niwn cab' yab'lilal tzac' quil jac tzaljc'ojlal, 'icha yab'lil yailal x'ec' 'a quib'n̈ on̈.

¹⁶ An̈ a checb' on̈ tic yet' eb' quin̈tl on̈, 'ac' cojcoc 'el a b'ob'en to satjub'tac yilxi.

¹⁷ Mamin Jehová, qui Diosal ach on̈, a cab' a wach'c'ojlal a chi 'ayc' 'a quib'n̈ on̈. 'Ac' yic' yip qui munljel on̈ Mamin, najtl cab' tzyac' qui munljel tic on̈.