Salmos 9 - Chuj San Sebastian Bible

SALMO 9 Alj wach' paxti 'a Dios

Sb'it David jun tic tzc'an junc mach tzjucb'tzan b'it yet' arpa yet' 'amay

¹ Mamin Jehová, wal 'a smasnil in c'ojol tzwaln in wach' paxti 'ayach. Tzwaln pax 'el yab'xil smasnil tas satjub'tac yilx a b'ojnac.

² Cojxn̈ej ach niwn el'chi. Ojn̈ej wali tzwa'n 'el waw yuj tzaljc'ojlal, tzin b'itnan pax a b'i.

³ A wal 'a ojltac, a eb' 'ajc'ojl yajch 'ayin, tz'at eb' 'elc 'a spatic, tztelw can 'ejm eb', tzchamcn eb'.

⁴ Ach tic Mamin, Yajl ach wal 'a stojlal. Ach 'em wocn 'a a despacho, 'ix a b'onyaj tas 'ix in c'an 'ayach.

⁵ A'jnac owl yet' junjn nacion̈. 'Ix a satn can 'el eb' xb'on maysch'olnil. 'Ix a sucn can sat sb'i eb' 'a jun 'ejmn̈ej, sec man̈x 'a b'a'n̈ tznax cot eb'.

⁶ 'Ix cham eb' 'ajc'ojl cha, satcn 'el pax schon̈b' eb' yet' 'a jun 'ejmn̈ej, yujto ach xa satl eb', sec man̈xtzac nax cot eb'.

⁷ Mamin Jehová Yajl ach 'a jun 'ejmn̈ej. 'Ix a b'o jun a despacho 'a 'aj 'oj a b'eyc'ojloc eb' 'anma'.

⁸ Wach' 'oj otc a b'eyc'ojlan yolyib'n̈q'uinl tic, ax a'n yajlil 'a yib'n̈ smasnil eb' chon̈b' 'a stojlal.

⁹ Tza colcn 'el eb' 'oltac tz'aj yixtxi, tza'n yip eb' 'aych 'a syailal.

¹⁰ A eb' tox ach 'ojcan 'eli, 'aych 'och yipc sc'ojl eb', may b'a'n̈ tzactj can eb' tzc'ann a colwal.

¹¹ B'itn coyc 'a Jehová, atn jun syajlil Sión. Calc 'el yab'xil 'a scal eb' chon̈b' to til wal tas sb'ojnac.

¹² A Jehová tzya'chn̈ej syailal eb' milm cham 'anma', man̈ ton̈joc tzyab'i yic tzyaln sb'a eb' 'aych 'a syailal.

¹³ Mamin Jehová 'o'ch cab' a c'ojl 'ayin, 'ilt wal cot in somc'ojlal 'aych yuj eb' matz in nib'ni. Coln 'el 'a yol sc'ab' chamel.

¹⁴ To 'ixta', 'oj wal-l 'a 'aj tz'och eb' 'anma 'a spuertail Jerusalén, to ach tic smoj wal yalx wach' paxti 'ayach. Caw tzin tzalj ticnec, yujto in a colcn 'eli.

¹⁵ A eb' 'anma 'a jun tzo'n̈ chuc nacion̈al, 'ix laj telw can 'ejm eb' 'a yol jun tzo'n̈ jul mun xlaj sb'o'. Mun a 'a yoc eb' 'aj xlaj can sut'n sch'an̈ yal eb' xlaj sc'ultac 'a'j 'ejm cha.

¹⁶ Mamin Jehová, ach 'ojcax 'el yuj tas wach' tza b'o'o. Mun tzyalej sb'a eb' tzb'on maysch'olnil.

¹⁷ A eb' cha, yet' eb' tzyac' sat sc'ojl 'ayach, 'oj 'atcn eb' 'a chamel.

¹⁸ Palta a eb' meb'a', man̈ ye'n̈joc tz'atcn eb' 'a satc'ojlal o'oj, 'oj jawc sc'ul schan eb' tas 'aych yipc sc'ojol.

¹⁹ Cotn̈ Mamin Jehová, man̈oc cab' eb' 'anma niwquil tzyutj sb'a 'ayach. B'eyc'ojlej eb' nacion̈ 'ayc' 'a ojltac.

²⁰ 'A'cn 'och eb' 'a xiwc'ojlal, tza'n yojcoc 'el eb' chajtlto nab'a 'anman̈ej eb'.