Salmos 89 - Chuj San Sebastian Bible

SALMO 89 Strato Dios yet' David

A jun tic sb'it win Hemán ezrahita

¹ Mamin Jehová, 'oj wal 'a scal in b'it chajtlto caw wach' a nab'en. A yic 'oj ach in b'itnoc 'a junjn 'ejem, 'oj wala', to yeln̈j tas tzala.

² 'Oj wal-li to a 'a chamc'ojlal may slajub', tzac' 'el'chocn̈ej tas tzala. Matz tac' sjelmji, 'icha satcha'an̈ may xon 'aj tzjelmji.

³ 'Ay jun a trato b'ob'il oj yet' David, atn jun a checb' sic'b'il 'el o'oj, ata aljnac can 'ixtic:

⁴ A eb' en̈tl b'aq'uin̈, an̈j eb' 'oj wa'ch reyl a jelc 'a smasnil tiempo, xa chi 'a 'a.

⁵ Mamin Jehová, smasnil eb' a'mal servil 'a satcha'an̈, tzb'itnej eb' a tojlal yet' a b'ob'en to satjub'tac yilxi.

⁶ May junc xo dios, mto junc tas 'ay 'a satchan̈ tztac' slajb'tzan sb'a et'oc.

⁷ Dios ach ton Mamin, caw niwn el'chi, 'ay smay a b'inaxi, oyn 'och eb' ángel 'a a tz'ey.

⁸ Mamin Jehová tztac' 'oj smasnil, ec yaj smasnil poder, may 'aj tza jel tas tzala; may junc xo lajn 'icha ach tic.

⁹ Ach tza tench wan a mar yic tzowx chan̈ a', sictac tz'aj a o'oj.

¹⁰ 'Ix a te'cn 'ejm no Rahab 'a yojl a mar, atn no niwc noc' 'ay smay, 'icha to chamnc xo x'ajcn no o'oj. Ax eb' 'ajc'ojl yajch 'ayach, sactzic can eb' yuj a poder.

¹¹ A satcha'an̈ yet' lum lum tic ecn̈ej yaji, ach xa b'o yolyib'n̈q'uinl tic yet' smasnil tas 'ay 'a 'a.

¹² Smasnil tas 'ay 'a stojlal norte masnto tzc'och 'a stojlal sur, ach xa b'o'o. A lum niwquil witz Tabor yet' lum Hermón, til wal sja'l ach sb'itnan eb' lu'um.

¹³ Caw wal 'ay a poder, tztac' oj smasnil.

¹⁴ A a despacho caw te'n yaj yuj tojlal yet' yuj wach'il. Ata tzcheclj 'el a chamc'ojlal to yel tz'el'ch tas tzala.

¹⁵ Mamin Jehová, a eb' 'anma tzach b'itnan yet' tzaljc'ojlal, caw wach' yic eb', yujto a 'a checnb'il tzb'eylb'ej eb'.

¹⁶ A wal 'a a b'i, ata tzyac' eb' tzaljoc sc'ojl 'a smasnil tiempo, ax a tojlal a chi 'oj 'i'noc chan̈ eb'.

¹⁷ Yujto ach ton wal tzac' quip on̈, yuj a wach'c'ojlal tza'n cac' ganar on̈.

¹⁸ Ach 'ix ac' jun qui Colmal on̈. Ach qui Diosal on̈, Cojxn ach toni, ach 'ix a sic' 'elt jun qui reyl on̈.

A schamc'ojlal Dios 'a David

¹⁹ Mamin Jehová, a 'a yic pecti cha, 'icha waychil 'ix otj paxtinc a b'a 'a eb' a checb' caw 'aych sc'ojl 'ayach. 'Ix aln 'a eb' 'ixtic: A 'a scal eb' in chon̈b' tic, ata xin sic' 'elt jun winc caw jeln ya'n owal, an 'ix wac' q'ue'choc 'a yopiso, an tzin colwj yet'oc.

²⁰ 'Ix 'ilchj jun in checb' wu'uj, atn David. A perjuma tzc'anlb'axi yic 'ay junc tas tz'och wico'oc, a xwac' 'ajxoc q'ue 'a sjolom yic xin ch'oxn 'eli to xq'uecn c'och reyal.

²¹ May wal b'a'n̈ 'oj 'och wan in colwj yet'oc, 'oj wac' ste'nal yet' in poder.

²² A eb' 'ajc'ojl yajch 'a 'a, ma'oj yac' ganar eb'; an̈jtona eb' tzb'on maysch'olnil, ma'oj tza'wnoc eb' 'a 'a.

²³ Yuj in poder ax ya'n ganar 'a yib'n̈ eb' 'ajc'ojl cha; ax ya'n milxoc cham eb' tzchichn 'och chi 'a 'a.

²⁴ Chamc'ojlb'iln̈ej wu'uj, 'oj wac' 'el'choc tas xwal 'a 'a. Wu'uj ax sq'ue'ch yet' yopiso cha.

²⁵ 'Oj wach' niwnb'oc 'aj 'oj yac' yajlil, 'oj 'el yich 'a a mar Mediterráneo, masnto 'oj c'och 'a a niwn a Éufrates.

²⁶ 'Oj yal 'ayn 'ixtic: In Mam ach, in Diosal ach, in Colmal aji. A 'aych tzin col in b'a, 'oj schioc.

²⁷ An xo 'oj wac' yopiso 'icha win b'ab'l 'unnab'il, 'ec'b'al 'oj 'aj 'a yib'n̈ smasnil eb' rey 'ay 'a yolyib'n̈q'uinl tic.

²⁸ A 'in chamc'ojlal 'a 'a, 'ayn̈j 'ec' yet' 'a smasnil tiempo, ax in trato yet'oc, may tz'aj sjelmji.

²⁹ A eb' yin̈til, 'oj wa'n̈j 'och eb' reyl 'a smasnil tiempo, 'oj b'eyn̈j jun 'opiso chi 'a yib'n̈ eb', ya' sb'a 'ayt 'ec' satchan̈ tic.

³⁰ Palta toto 'oj yactc can eb' in cuynb'il tic, toto man̈x 'oj sb'eylb'oc eb' in checnb'il,

³¹ toto 'oj 'ec' eb' 'a yib'an̈, ma'oj syiclc eb' tas tzwala,

³² toto 'ixta', 'oj wa' cot syailal eb' yuj stenmtaquil, yuj tas maysch'olnil tzlaj sb'o eb'. 'Icha to a te jixc'ab'te 'oj wa'lb'oc 'a eb'.

³³ Palta man̈ yujoc cha, ax wactn in chamc'ojlan David, caw yel 'aynn̈ej 'ec' yet'oc.

³⁴ Ma'oj in ju 'in trato yet'oc. 'Oj wac' 'el'choc in paxti wa'jnac 'a 'a.

³⁵ Jun 'ejmn̈ej 'ix wac' in ti 'a 'a, ma'oj wac' 'es:

³⁶ A eb' yin̈til, 'oj 'och eb' reyl sjelc 'a smasnil tiempo ya' sb'a 'ayt 'ec' c'u.

³⁷ Caw te'n yaj eb' 'icha 'uj, te'nn̈ej 'oj yutc sb'a eb', ya' sb'a 'ayc' satchan̈ tic, xa chi.

Xpatquilx 'el win rey yuj Dios

³⁸ Ax ticnec Mamin, 'in xa chab'c'ojlej win rey sic'b'il 'el o'oj, xa patquiln can 'el winac, 'ix cot wal owl 'a 'a.

³⁹ 'Ix a ju a trato yet' win a checab', xa juln 'ejm can scorona 'a sat lu'um.

⁴⁰ A smuroal schon̈ab', tox 'ix lan̈chj 'ejmi, a jun schon̈b' cha, 'ix lajw 'ejm o'oj.

⁴¹ Ax smasnil eb' 'anma tz'ec' ta', tzlaj yelc' eb' tas 'ay 'a jun chon̈b' cha; ax jun tzo'n̈ xo eb' chon̈b' 'ay 'a sla'nil, xlaj b'uchwj eb' 'a 'a.

⁴² 'Ix ac' yi' chan̈ eb' 'ajc'ojl chi sc'ab' 'a cha'an̈, caw stzalj eb', yujto xyac' ganar eb' owl chi snani.

⁴³ 'Ix ej can 'ec' ye yespada yic x'och 'a owal, man̈x 'ic ach colwj xon jac yet'oc.

⁴⁴ Ach 'ix ej 'ec' sjelnal, 'ix a juln can 'ejm jun yopiso chi 'a sat lu'um;

⁴⁵ 'ix a c'ochltej sq'uinal, xa'n sq'uixwloc.

⁴⁶ Mamin Jehová, ¿b'a'n̈ wal tzactj owx 'och 'ayin? ¿Tom an̈j 'ijnoc wal 'ay cot yowl 'a c'ojl 'ayn 'icha sn̈ilchj c'ac'?

⁴⁷ Na cot nab'an to c'ochn yoc jab' in q'uinl 'ix ac'a. An̈ 'anman̈ tic on̈ jab' wal tiempo tzac' quil on̈.

⁴⁸ May wal junc mach to mun yic sb'a yet' sq'uinal, to ma'oj chamoc. May wal junc mach tztac' scoln 'el sb'a 'a yol sc'ab' chamel.

⁴⁹ Mamin, ¿'aj wal 'ay jun a chamc'ojlal a ch'oxjnac 'a yic b'ab'el, atn jun aljnac 'a David to 'oj ac' 'el'choc?

⁵⁰ Na cot nab'an to an̈ a checb' on̈ tic, til wal tas ya yaln eb' 'anma 'ayn̈ on̈; a jun tzo'n̈ spaxti eb' cha, caw wal ya yajcn 'ayin.

⁵¹ An sic'b'iln 'el oj tic, caw ya jun tzo'n̈ paxti tic tzwab'i: atn schichnc'ojlal eb' 'ajc'ojl yajch 'ayach, caw ya yaln eb' 'a in patquil.

⁵² Alx cab' wach' paxti 'a sb'i Jehová 'a smasnil tiempo. B'o cab' 'ixta'.