Salmos 88 - Chuj San Sebastian Bible

SALMO 88 Mamin, ¿tas yuj patcab'iln 'el o'oj?

A jun tic sb'it eb' yin̈tl Coré tz'ib'b'il can yuj win Hemán ezrahita tzc'anlb'ej junc mach tzjucb'tzan b'it

¹ Mamin Jehová in Diosal ach, in Colmal aji, sc'ual yac'wlil in c'ann a colwal 'a wib'an̈.

² Chaj wal ab' in lesl tic, tza b'onyaj 'ayin.

³ Til wal tas tzjaw 'a wib'n̈ tzwab'i, 'icha wal to yol xo sc'ab' chaml 'ayn 'eq'ui.

⁴ 'Ayn xo 'och stz'acb'oc chaml tzwab'i, caw man̈x 'a wip.

⁵ A wal tzwab'i to 'ayn xo can 'at 'a scal eb' chamnac. 'Icha eb' tzchamcn yuj owal, tzmucx can 'aj tzchami, 'ixta waj tzwab'i. 'Icha pax tz'aj eb' satnc xo a c'ojl 'a 'a, man̈xtzac ach colwj yet'oc, 'ixta waj tzwab'i.

⁶ A wal tzwab'i, caw najt wajcn 'at oj 'a yich junc xab' olan, 'a 'aj caw q'uic'q'uinal.

⁷ Xcot wal yowl a c'ojl 'a wib'an̈, til wal somc'ojlal xjaw 'a wib'n̈ o'oj.

⁸ 'Ix ej 'el snab'en eb' in wach'c'ojl 'ayin, in schacn can 'el eb'. Lajn wal in 'aj 'icha junc win 'aych 'a preso, matz tac' yeli.

⁹ Caw wal tzin 'oc' si'mb'il, tzmal yol in sat woc' yuj in cusc'ojlal. Mamin Jehová, 'a junjn c'u tzwaln in b'a 'ayach, a 'aych tzin moj q'ue in c'ab'.

¹⁰ ¿Tom 'oj a ch'ox to yil eb' chamnc chi a poder? ¿Tom 'ayt 'aj 'oj yal eb' chamnc chi yuj diosal 'ayach?

¹¹ ¿'Ayt am 'aj 'oj alxoc a chamc'ojlal yet' tas yel 'a scal eb' chamnc cha?

¹² ¿Tom 'ay eb' 'oj alnc cot a tojlal, yet' smasnil tas satjub'tac yilx a b'ojnac? A 'aj 'ay q'uic'q'uinl yic chaml cha, ata tz'atcn jun tzo'n̈ chi 'a satc'ojlal.

¹³ Mamin Jehová, an xo tic a 'aych tzwal in b'a, 'a junjn sq'uin̈b'ial tzin leslwi 'ayach.

¹⁴ ¿Tas wal yuj tzin a patquilj can 'eli? ¿Tas yuj tza c'ub'j 'el a b'a 'ayin?

¹⁵ Yictax in quelmal, 'aych xon jun in yailal tic, 'ijn wal chamnc in yu'uj. Palta wa'jnac techjoc jun tzo'n̈ niwc yailal chi o'oj, ax ticnec 'ijn wal man̈x 'oj techjoc wu'uj.

¹⁶ A yowl a c'ojl 'ix 'ec' 'a wib'an̈, 'ac'b'iln xo ganar yu'uj.

¹⁷ Smasnil jun tzo'n̈ cha, 'ix 'och oyn 'ayn 'icha junc a 'elmal a'.

¹⁸ 'Ix ej can 'el snab'en eb' in wach'c'ojl 'ayin, yet' eb' witb'eym in b'a yet'oc, ax ticnec, cojxn̈ej q'uic'q'uinl jun waj yet'oc.