Salmos 86 - Chuj San Sebastian Bible

SALMO 86 Lesl yic tzc'anx scolwal Dios

A jun tic slesl David

¹ Mamin Jehová scha cab' a c'ojl ab'n tas tzwala, yujto caw wal 'oltac in, til wal in cusc'ojlal.

² Coln 'el 'a yol sc'ab' jun tic, yujto yiclum in 'ayach. Mamin, coln an a checb' in tic, yujto ach tzach wa'ch yipc in c'ojol.

³ Mamin Jehová, 'o'ch cab' wal a c'ojl 'ayin, yujto a 'aych tzwal in b'a 'a smasnil tiempo.

⁴ 'Ac' in tzaljc'ojlal an a checb' in tic, yujto cojn 'aych tzin leslwi.

⁵ Ach tic caw wal wach' a nab'en. 'Ay a niwnc'ojlal, 'ay pax a chamc'ojlal 'a smasnil eb' tzyal sb'a 'ayach.

⁶ Mamin Jehová, chaj wal in lesl tic, b'oyaj tas tzin c'an 'ayach.

⁷ A yic 'ayn 'och 'a in yailal, tzwaln in b'a 'ayach, tzwilni to tzin a ta'wjn̈ej.

⁸ Toc wal 'ay junc xo dios lajn 'icha ach tic. Toc wal 'ay junc xo tas tzlajb'tzej sb'a yet' tas tza b'o'o.

⁹ Mamin, ach xa b'o smasnil eb' nacion̈, 'oj jawc eb' 'anma chi wul yac' 'ejm sb'a 'ayach, yic tzyi'n chan̈ eb' a b'i.

¹⁰ Yujto cojn ach Dios ach; caw niwn el'chi, tza b'on tas caw satjub'tac yilxi.

¹¹ Mamin Jehová ch'ox wal a b'e 'ayin, sec yiclum tzin 'aj 'ayach. 'Ac' in te'nal, sec nab'ilchn̈ej wu'uj.

¹² Ach Wajlil, ach in Diosal, 'oj wal in wach' paxti 'aych yet' smasnil in c'ojol, 'a smasnil tiempo 'oj wi'chan̈ a b'i.

¹³ Yujto yel xo wal niwn a chamc'ojlal 'ayin, yuj cha, ma'in a chaj 'ejm 'a yol sjul-l eb' chamnac.

¹⁴ Ach in Diosal, 'ay wal jun b'uln̈ eb' 'anma tzyij chan̈ sb'a, tzmeltzj 'och eb' 'ajc'ojlal 'ayin. Tznib'j eb' tzin smila, caw may el'ch 'a sat eb'.

¹⁵ Ach xo tic Mamin, caw wach' a nab'en. C'un yo'ch a c'ojol, man̈ comnoc tzcot owal. 'Ay a chamc'ojlal, yel pax tas tzala.

¹⁶ 'Ilt in wal coti, 'o'ch cab' wal a c'ojl 'ayin. Coln 'el an a checb' in tic, 'ac' wal wip.

¹⁷ 'Ac' wil a wach'c'ojlal 'a caw stojlal, sec 'oj yil eb' 'ajc'ojl yajch 'ayin, ax sq'uixw 'el eb'. Mamin colwjan̈ wet'oc, 'ac' pax sniwnal in c'ojol.