Salmos 85 - Chuj San Sebastian Bible

SALMO 85 Colwjan̈ pax quet' on̈

A jun tic sb'it eb' yin̈tl Coré tzc'anlb'ej junc mach tzjucb'tzan b'it

¹ Mamin Jehová, yel xo wal wach' a nab'en 'a quib'n̈ an̈ a chon̈b' on̈ tic, yuj cha, 'ix a'n meltzjoc qui tzaljc'ojlal an̈ yin̈tl on̈ Jacob tic jun 'ejm xo.

² 'Ix ac' niwnc'ojlal qui maysch'olnilal on̈, 'ix a'n lajwc smasnil qui mul on̈.

³ Yelc'ojlal 'ix ej 'och wan yowl a c'ojl 'a quib'n̈ on̈ yet' a c'a'lc'ojlal.

⁴ Ach qui Diosal on̈, qui Colmal aji, colwjan̈ pax quet' jun 'ejm xo on̈. 'Ij 'och wan yowl a c'ojl 'a quib'n̈ on̈.

⁵ ¿Tom 'ayn̈j cot yowl a c'ojl 'a quib'n̈ 'a smasnil tiempo on̈?

⁶ ¿Man̈x am tzac' jacx qui tzatzl on̈, sec wach' tzon̈ tzalj pax et' on̈?

⁷ Mamin Jehová, ch'ox wal a chamc'ojlal 'ayn̈ on̈, tzon̈ a coln pax 'eli.

⁸ 'Oj in maclc wab' tas 'oj yal Jehová Dios, yujto 'oj yac' junc'ojlal 'a quib'n̈ec an̈ yic xo caji, sec man̈x 'oj qui b'oc junc tas yet' qui man̈ nab'enalec.

⁹ Caw wal b'ecn sc'ojl Dios scolwj 'a eb' tz'och 'emmquilal 'a 'a, sec 'oj checljoc cha'an̈, to 'ayc' 'a qui calc yet' spoder.

¹⁰ 'Oj sch'ox Dios schamc'ojlal 'a scal eb' schon̈ab', ax yoch eb' yiclumal 'a 'a. A eb' 'anma tojl sb'eyb'al, 'oj scha eb' sjunc'ojlal Dios.

¹¹ A eb' 'anma 'a sat lum tic, 'oj syiclc eb' 'a smasnil sc'ojol, ax Dios caw tojl snab'en, yet' stzaljc'ojlal ax yiln cot eb' 'a satcha'an̈.

¹² A Jehová a 'oj 'a'noc cot n̈ab', ax ya'n lum qui lumec tic sb'a'al.

¹³ A stojlal qui Diosalec a b'ab'l yu'uj, a tztojlb'tzan sb'e 'aj tzb'eyi.