Salmos 84 - Chuj San Sebastian Bible

SALMO 84 Tzin nib'j tzin 'aj 'a yatut Dios

A jun tic sb'it eb' yin̈tl Coré tzc'anlb'ej junc mach tzjucb'tzan b'it

¹ Caw wal nib'jub'tac yilx a cajnub' Mamin Jehová, smasnil tas tztac' o'oj.

² Til wal in nib'n waj 'a yamq'uil atut ach in Diosal, ach 'aj q'uinl ach. 'A smasnil in c'ojol tzin b'itn 'ayach.

³ Mamin Jehová, a no tz'unun yet' e no pechul, tz'ilchj 'aj tzb'o e no so yune', atn 'a stz'ey yet'l a xajmb'al. Ach in Diosal, in Reyl ach, smasnil tas tztac' o'oj.

⁴ Caw wach' yic eb' 'ayc'n̈ej yil yopiso 'a atut, may tz'aj stzactzj eb' ach sb'itnani.

⁵ Caw wach' yic eb' to yipc'ojlal aj yu'uj, atn eb' tznib'j tzc'och yil q'uin̈ 'a lum tzaln Sión 'aj tz'och 'emmquilal 'ayach.

⁶ A yic tzlaj 'ec' eb' 'a lum pan̈n yic cus'ojlal, tzlaj checlj can a spac'b'a yuj eb', ax yic tzya'n n̈ab', tzlaj b'ut'j chan̈ a 'a lum pan̈n cha.

⁷ 'Oj 'och yip eb' si'mb'il, ax 'a lum tzaln Sión, ata 'oj ach yil eb' ach in Diosal.

⁸ Mamin Jehová smasnil tas tztac' o'oj, qui Diosal ach an̈ yin̈tl on̈ Jacob tic, chaj wal ab' qui lesl on̈.

⁹ Ach qui Diosal on̈, 'ilt cot wal jun qui reyl tic on̈, yujto ach xa si'li, yuj cha, 'ac' a wach'c'ojlal 'a yib'an̈.

¹⁰ Yel xo wach' 'ayn 'ec' junc c'u 'a yamq'uil atut, 'a yib'n̈ junc mil ab'il 'ayn 'ec' 'a junc xo lugar. Yel xo wach' tzin c'och 'a spuertail atut yic tzin 'och 'emmquilal 'aych ach in Diosal, 'a yib'n̈ to a 'a yatut eb' maysch'olnil sb'eyb'al 'aj tzin 'aj cajan.

¹¹ Mamin Jehová qui Diosal ach on̈, ach tzac' sacq'uinl 'ayn̈ on̈. Tzon̈ a tan̈wj paxi, tza'n pax a wach'c'ojlal 'a yib'n̈ eb' tzb'on stojlal. Matz ej 'ec' tas wach' 'a eb'.

¹² Mamin Jehová, smasnil tas tztac' o'oj, caw wach' yic eb' tzach 'a'n 'och yipc sc'ojol.