Salmos 83 - Chuj San Sebastian Bible

SALMO 83 Lesl yic tzc'anx scolwal Dios

A jun tic sb'it Asaf tzc'anlb'ej junc mach tzjucb'tzan b'it

¹ Ach in Diosal man̈ ach can 'a sictaquil, man̈ ach 'och wa'an.

² 'Ilt eb' 'ajc'ojl yajch 'ayach, caw tzach syajl eb'. 'Ayc' eb' laj yac' somchjoc eb' a chon̈ab', tzlaj chichnc 'och eb' 'ayach.

³ 'Ix laj smol alc eb', to 'ay tas tu wan snan eb' 'a yib'n̈ eb' a chon̈b' tan̈b'il o'oj.

⁴ Tox sna eb' to tzon̈ wul satl eb' on̈, sec man̈x 'a b'a'n̈ tzon̈ 'och niwc nacion̈al. Tznib'j eb' to man̈x 'a b'a'n̈ tzon̈ b'inax an̈ israel on̈ tic on̈.

⁵ 'Ix yac' eb' trato 'a a patquil, to junn̈j tzyutj sb'a eb' smasnil:

⁶ Atn eb' 'aj Edom, eb' ismaelita yin̈tl can 'ix Agar, eb' 'aj Moab,

⁷ eb' 'aj Gebal, eb' 'aj Amón, eb' yin̈tl Amalec, eb' filisteo, eb' 'aj Tiro,

⁸ yet' pax eb' 'aj Asiria. 'Ix ya'ch sb'a eb' yet' eb' yin̈tl can Lot.

⁹ 'Icha 'ix otj eb' 'aj Madián, 'icha 'ix otj win Sísara yet' pax win Jabín 'a sti a Cisón, 'ixta cab' tz'aj eb' o'oj.

¹⁰ Ata 'ix chamcn eb' 'a Endor, 'ix 'ochcn eb' syaxilc sat lum lu'um.

¹¹ 'Icha 'ix otj Oreb, Zeeb, Zeba yet' Zalmuna, 'ixta tzotj eb' yajl yaj 'a scal eb' cha,

¹² yujto cob' xyal eb' 'ixtic: 'Oj 'och lum slum Dios quicooquec, xchi cob' eb'.

¹³ Ach in Diosal, 'icha cab' tz'aj c'alem s'at yuj chacxuxm'ic', 'ixta tzotjcan eb', 'icha s'at junc tacn̈ xil te yuj 'ic', 'ixta cab' tz'aj eb'.

¹⁴ 'Icha s'at c'ac' 'a waymtac, c'uxn tzn̈us lum tzalctac, 'ixta cab' s'atcn eb'.

¹⁵ 'Icha cab' sb'ey chacxuxm 'ic', 'ixta cab' tzotj a pechn b'ey eb' yet' yowl a c'ojol.

¹⁶ Mamin Jehová, 'ij 'el sq'uixwel eb', sec 'oj 'och tza'n eb' o'oj.

¹⁷ Q'uixw cab' can 'el eb' 'a smasnil tiempo, cham cab' eb' 'a scal q'uixwc'ojlal,

¹⁸ sec 'oj 'ojcaxc 'eli to cojn ach Jehová ach, to cojn ach niwn el'ch 'a yib'n̈ lum lum tic.