Salmos 81 - Chuj San Sebastian Bible

SALMO 81 A swach'c'ojlal Dios*r* yet' stenmtacl eb' israel

Sb'it win Asaf jun tic, tzc'anlb'ej junc mach tzjucb'tzan b'it

¹ B'itn coyc yet' qui tzaljc'ojlal 'a Dios, yujto a quipc yaji. Caw 'ip qui b'itnanec Dios, atn qui Diosalec an̈ yin̈tl on̈ec Jacob tic.

² B'itn coyc yet' qui pandero, yet' qui arpa mto qui salterio.

³ A yic tzpac' 'uj tzcutz'nec qui trompeta, tzcutz'nec pax 'a yic tzc'ojn sb'a 'uj, yujto niwquil q'uin̈ jun chi 'ayn̈ec.

⁴ A jun tic schecnb'il qui Diosalec an̈ israel on̈c tic, an̈ yin̈tl on̈c Jacob tic;

⁵ atn jun checnb'il tic alb'il 'a eb' qui mam quichmec, yic sc'och Dios yac' owl 'a Egipto. Ata 'ix yab' eb' jun ti', to ma'ix nachj 'el yuj eb'.

⁶ 'Ix yaln Dios 'a eb' 'ixtic: Tox xwij 'el jun eyictz 'aych 'a eyib'an̈, ex in col 'elt 'a yol sc'ab' munljel caw ya.

⁷ A yic 'ayx 'ec' 'a yol sc'ab' eyailal in eyawtni, yuj cha, ex in coln 'elta. In ta'w 'ayx 'a scal jun 'asn 'aj til wal sc'an̈ c'u; ex wa'n prowal 'a sti a a yic Meriba.

⁸ Ex in chon̈ab', 'ab'c tas 'oj wala', ex israel comnoc wal yiclum tzeyutj e b'a 'ayin.

⁹ May cab' e diosal tzeyij cot 'a junc xo chuc chon̈b'al, man̈ eyac' 'ejm e b'a 'a jun tzo'n̈ dios man̈ 'ojcab'ilc cha.

¹⁰ An Jehová e Diosal in, an ex wij 'elt 'a Egipto. Jacc e ti', ax wa'n tas tze c'uxu, xchi 'a eb'.

¹¹ Palta x'ec' jun tiempoal, xyaln pax yuj eb' 'ixtic: A eb' in chon̈b' tic, ma'ix schaj eb' yab' tas xwala; a eb' israel tic, ma'in syiclj eb'.

¹² Yuj cha, xwa'n can 'at eb' 'a scal stenmtaquil, 'ix ya'n eb' sgana 'icha tznib'ej.

¹³ A eb' in chon̈ab', comnoc xyab' eb' tas xwala; comnoc sb'eylb'ej eb' israel tas xwal 'a 'a.

¹⁴ To 'ixta', wal 'a jun mutz' satil 'ix wa'n am xiwc'ojlal eb' 'ajc'ojl yajch 'a eb'. 'Ix wa'n am pax syailal eb' tzchichn 'och 'a eb' cha.

¹⁵ Ax 'a eb' matz in nib'ni, 'ix wac' 'em wotz'n am eb' xiwi, ax syailal eb', 'ix cann̈j am 'a yib'n̈ eb' 'a smasnil tiempo.

¹⁶ Q'uinloc syiclj eb' israel tas xwal cha, to 'ixta', ax 'ixm trigo caw wach' a xwac' swa eb', xwa'n am yuc' eb' no calte'al yal chab', xchi Dios.