Salmos 8 - Chuj San Sebastian Bible

SALMO 8 Niwn yel'ch sb'i Jehová

Sb'it David jun tic tzc'an junc mach tzjucb'tzan b'it yet' te arpa

¹ Mamin Jehová Cajlil ach on̈, cojxn̈ej ton a b'i niwn yel'ch 'a smasnil yolyib'n̈q'uinal tic. Niwn pax yel'ch a b'i 'a satcha'an̈.

² Tza c'anlb'an eb' 'unin yet' eb' tz'ulc 'unin, yic tzyaln eb' wach' paxti 'ayach, sec wach' sictac tz'aj eb' 'ajc'ojol yet' eb' tzchichn 'och 'ayach.

³ A yic tzwiln q'ue satcha'an̈, tzin b'eyc'ojlani to ach b'ojnac; xa'n can 'och 'uj yet' smasnil c'anal 'a yet'ul.

⁴ Yuj cha, tzwaln 'ixtic: ¿Tas quel'ch an̈ 'anman̈ tic on̈, yuj cha, tzon̈ a nan coti, tzach 'och 'il cuj on̈?

⁵ 'Ayt wal jab'x matz on̈ tzawni 'a eb' ángel on̈, 'ixta 'on̈ otj on̈ a b'oni. 'Ix aln cani to tzon̈ b'inax on̈, 'ay cab' pax quel'ch on̈.

⁶ 'Ix a'n can 'och copiso 'a yib'n̈ tas a b'ojnac, 'ix a'n can smasnil 'a yol qui c'ab' on̈:

⁷ Atn no calnelu, no wacax, no calte'al noc';

⁸ smasnil no ch'ic tz'ec' 'a satcha'an̈, smasnil no chay 'ay 'a yol a mar, yet' smasnil jun tzo'n̈ xo no noc' tz'ec' 'a yol a mar cha.

⁹ Mamin Jehová Cajlil ach on̈, caw niwn yel'ch a b'i 'a smasnil yolyib'n̈q'uinl tic.