Salmos 79 - Chuj San Sebastian Bible

SALMO 79 Cusc'ojlal yuj Jerusalén

A jun tic sb'it Asaf

¹ Ach qui Diosal on̈, 'ix wul stoc'c' eb' chuc chon̈b'al lum a lum tic. 'Ix yixtj 'el eb' atut, xlajw cha, sma'n can juwc eb' chon̈b' Jerusalén.

² 'Ix laj can t'ocn sniwnal eb' a checb' yuj eb', atn eb' caw te'n xyutj sb'a 'ayach. A schib'jal eb' cha, 'ix laj schi no 'usej, yet' pax no calte'al noc'.

³ 'Icha sb'ey a a', 'ixta wal xb'ey schic'l eb' 'a yol chon̈b' Jerusalén, may xon mach xmucn eb'.

⁴ Til wal qui b'uchx yuj eb' 'anma oyn 'och 'a qui la'nil on̈, tzetzjub'tac quilx 'a sat eb' on̈.

⁵ Mamin Jehová, ¿b'a'n̈ to wal tz'ec' yowl a c'ojl 'a quib'n̈ on̈? ¿Tom an̈ja caw c'ac' a c'ojl 'a quib'n̈ 'icha te c'ac' an̈ja chac sc'aq'uil?

⁶ A jun a c'a'lc'ojlal cha, 'at cab' can 'a yib'n̈ eb' chuc chon̈b'al, yet' 'a yib'n̈ eb' yajl may 'aj tzyac' 'ejm sb'a 'ayach.

⁷ Yujto on̈ smil cham eb' an̈ yin̈tl on̈ Jacob tic. Ax jun qui chon̈b' tic on̈, 'ix satcn 'el yuj eb'.

⁸ Man̈ 'ac' qui tup lajwc smul eb' qui mam quichm on̈; cot cab' a chamc'ojlal 'a quib'n̈ mu'c on̈, yujto caw man̈x 'a quip on̈.

⁹ Ach qui Diosal on̈, qui Colmal aji, colwjan̈ quet' on̈, tza'n lajwc qui mul on̈, sec matz b'uchx a b'i.

¹⁰ Toto ma'ay, 'oj yal eb' chuc chon̈b'al chi 'ixtic: ¿'Ajtil 'ay e Diosal cha? 'oj schic eb'. Comnoc wal tzac' quil on̈ tas wal tzotj a'n spac schamlil eb' a checab'. Ax eb' chuc chon̈b'al cha, 'oj yab' eb' yab'xil jun cha.

¹¹ A yic tzyaln sb'a eb' wit chon̈b' preso yaji, chaj ab' tas tzyal eb'. Col eb' yet' a poder, yet' eb' 'ayx 'och chaml 'a yib'an̈.

¹² Ach Cajlil on̈, uc 'ejm cab' tzac' spac jun tic 'a eb' 'anma cajn 'a qui la'nil tic on̈, yujto caw ya yaln eb' b'uchwal paxti 'ayach.

¹³ Toto tza b'o 'ixta', an̈ xo a chon̈b' on̈ tic, 'icha to a calnelu caji. 'Oj caln̈j qui wach' paxti 'ayach, ax qui b'itnan b'it 'aych 'a smasnil tiempo.