Salmos 78 - Chuj San Sebastian Bible

SALMO 78 A scolwal Dios 'a schon̈ab'

Sb'it win Asaf jun tic

¹ Ex wit chon̈ab', macljec eyab' in cuynb'il, 'a'c wal 'och e chicn 'a tas tzwala.

² 'Oj wal jun tzo'n̈ paxti to caw niwn yel'ch 'ayex; atn jun tzo'n̈ tas to c'ub'b'il 'el 'a yictax pecti'.

³ A jun tzo'n̈ cha, cab'jnac yalx eb', caw cojquec eb' si'mb'il; atn jun tzo'n̈ alb'il can 'ayn̈ec yuj eb' qui mam quichmec.

⁴ Ma'oj qui c'ub'quec 'el 'a eb' cunnalec, yet' 'a eb' tot 'oj 'aljoc. ¡'Oj calc wach' paxti 'a Jehová! 'Oj calc 'el sjelnal yet' smunljel to satjub'tac yilx b'ob'il yu'uj.

⁵ A Dios 'ix 'a'n can jun ley 'a eb' qui mam quichmec atn eb' yin̈tl Jacob. Xya'n can jun tzo'n̈ checnb'il chi 'ayn̈ an̈ Israel on̈c tic. 'Ix yaln can 'a eb' qui mam quichmec to tzon̈ scuyc can eb'. An̈ec xo 'oj qui cuyc can pax eb' cunnalec,

⁶ sec wach' tzyojquej 'el eb' yin̈tl eb' b'aq'uin̈, atn eb' tot 'oj 'aljoc. Ax yunnal eb' tot 'oj 'aljoc cha, 'oj scuy pax eb' yunnal chi b'aq'uin̈,

⁷ sec a Dios 'oj ya'ch eb' yipc sc'ojol. Ma'oj sat sc'ojl eb' 'a tas b'ob'il yuj Dios, yiclum 'oj yutc sb'a eb' 'a schecnb'il.

⁸ Man̈ lajnoc 'oj yutc sb'a eb' 'icha eb' qui mam quichmec, yujto a eb' cha, 'e'nc eb' 'a yib'an̈, tenmtac eb', may pax ste'nal eb'. Man̈ yiclumoc eb' 'a Dios.

⁹ A eb' soldado yic yin̈tl Efraín, 'ay syamc'ab' eb' yic owal, palta ax yic x'och owal, 'ix 'at eb' 'eloc.

¹⁰ Ma'ix syiclj eb' strato yet' Dios, ma'ix snib'j xon eb' syiclj scuynb'il.

¹¹ Xyac' eb' sat sc'ojl 'a tas b'ob'il yu'uj, yet' 'a tas satjub'tac yilx sch'ox yil eb'.

¹² A Dios 'ix sb'o tas satjub'tac yilx 'a yojltac eb' qui mam quichmec, atn 'a Soán 'a yol yic Egipto.

¹³ 'Ix poj snan̈l a mar yu'uj, schecn 'ec' eb' 'anma 'a yojol, syamn can 'och wan jun a chi 'icha junc muro.

¹⁴ A 'a c'ual, xyij b'ey eb' yet' jun 'asun, ax 'a 'ac'wal xyij b'ey eb' yet' sacq'uinlal jun c'ac'.

¹⁵ A 'a cusltac lu'um, 'ix poj snan̈l q'uen q'uen yu'uj, xlaj ya'noc yuc' eb' 'anma a si'mb'il.

¹⁶ A Dios a 'ix 'a'n 'eltoc a a 'a sat q'uen q'ue'en, jun a niwn a tzb'ey yoc.

¹⁷ Palta an̈j 'ijnoc 'ix 'och smul eb' qui mam quichmec chi 'a Dios to niwn yel'chi, 'ix meltzj 'och eb' 'a 'a, yic 'ayc' eb' 'a cusltac lu'um.

¹⁸ 'Ix ya'lj prowal eb' Dios, sc'ann eb' sc'ux tas caw wach' 'a 'a.

¹⁹ Xyaln eb' speclal Dios 'ixtic: ¿Tom 'oj stac' ya'n qui c'ux tas wach' 'a cusltac lum tic?

²⁰ Yel toni, 'ix poj snan̈l q'uen q'uen yuj Dios; ax 'a q'uen x'elt jun niwn a tzb'ey yoc. Caw xc'unb' chan̈ sat lum lum yuj a', ¿palta tom wal 'oj stac' ya'n tas tzqui c'uxu? ¿tom 'oj techjoc ya'n chib'j qui chi'? xchi eb'.

²¹ A yic xyab'n Jehová jun tic, caw wal xcot yowl 'a eb' qui mam quichmec cha. Ax yowl sc'ojl cha, lajn wal yet' c'ac', 'ix jaw yowl sc'ojl 'a yib'n̈ eb'.

²² Yujto ma'ix ya'ch eb' sc'ojl 'a Dios, ma'ix ya'ch eb' yipc sc'ojl scolwal.

²³ Wach'xam 'ixta xyutj sb'a eb', palta ax Dios 'ix yac' 'emt 'asun, sjacn satcha'an̈ sec tz'emt tas tzc'ux eb'.

²⁴ 'Ix ya'n 'emt maná 'a yib'n̈ schon̈b' 'icha wal yem n̈ab', 'ixta xyutj ya'n 'emt satchan̈il trigo swaj eb' 'anma cha.

²⁵ A wal tas tzc'ux eb' ángel, a chi sc'ux eb' 'anma'. 'Ix 'ajx wa eb' si'mb'il yuj Dios.

²⁶ A 'ic' tzcot 'a stojlal 'aj tzq'uel c'u, yet' jun tzcot 'a stojlal sur, a 'ix jaw jommoc 'a satcha'an̈, a Dios x'i'n cot yet' spoder.

²⁷ A 'ic' chi x'i'n cot schib'j eb' schon̈ab'. 'Icha wal pococ, mto 'icha yarenail sti a mar, 'ixta x'aj sjaw wal secnjoc no ch'ic.

²⁸ A 'aj 'ay scamplamento eb' chon̈b' cha, ata 'ix yac' 'emt Dios e no ch'ic cha.

²⁹ Xyac' wal eb' 'anma chi sgana schin no', masnto xb'ut'j eb' yuj no'. 'Ixta xyutj Dios ya'n 'el'choc snib'b'en eb' 'anma cha.

³⁰ A yic mantzac yoch'b' no chib'j chi yuj eb', tzat snib'j eb' schi no',

³¹ 'ix cot yowl sc'ojl Dios 'a yib'n̈ eb', smiln cham eb' winc caw 'ay yip. C'uxn xcham eb' winc caw jeln 'a scal eb' israel cha.

³² Wach'xam 'ixta 'ix yutj Dios, man̈ yujoc cha, 'ix ya'n 'och eb' 'a sc'ojol, an̈j 'ijnoc yoch smul eb'; ma'ix ya'ch eb' snab'en 'a tas satjub'tac 'ix sb'o Dios.

³³ Yujn̈ej wal cha, 'ix satn 'el Dios eb', 'icha wal yic tzqui'n quic', 'ixta x'aj eb' satl 'a scal xiwc'ojlal.

³⁴ A yic tzcham jaywn̈oc eb', ax nan̈locx eb' 'ix yal sb'a eb' 'a Dios. 'A smasnil sc'ojl eb' 'ix meltzj eb' 'a 'a.

³⁵ 'Ixta to b'i'an, snan cot eb' Dios caw niwn yel'chi, atn Dios 'aj wach' scoln sb'a eb', a tztan̈wni pax eb'.

³⁶ Tzyal eb' wach' paxti cob' yet' sti', palta caw 'es tzyac' eb'.

³⁷ May xon jac 'aj wach' xyutj sb'a eb', man̈ yelc tzyal eb', matz yac' 'el'choc eb' strato yet' Dios.

³⁸ Palta a Dios, caw tz'o'ch sc'ojl 'a eb', tzyac' lajwc smul eb', matz satx 'el eb' yu'uj. Til wal 'ejm tzyij 'ec' yowl sc'ojl 'a yib'n̈ eb', matz yac' 'el'choc yowl sc'ojl 'a eb'.

³⁹ 'Ix sna cot Dios, chajtlto chamlb'a 'anman̈ej eb' qui mam quichmec cha, lajn eb' yet' 'ic' tz'atcni, man̈xtzac meltzj paxi.

⁴⁰ Til wal 'ejm ma'ix syiclj eb' tas xyal Dios 'a cusltac lu'um, caw 'ix stzuntzj cot eb' yowl sc'ojol.

⁴¹ Palta an̈j 'ijnoc ya'n prowal eb' Dios, xya'n eb' cus sc'ojl jun qui Diosalec to Cojxni.

⁴² Ma'ix sna cot eb' jun tiempoal yic 'ix scoln 'elt Dios eb' yet' spoder 'a yol sc'ab' eb' tz'ixtn eb' 'a Egipto.

⁴³ A wal 'a jun tiempoal cha, a 'a Soan 'a yol yic Egipto, ata 'ix sb'o Dios jun tzo'n̈ tas niwn yel'chi, caw satjub'tac yilx 'a yib'n̈ eb' 'aj Egipto cha.

⁴⁴ Atn yic x'och a a chic'al, ax eb' 'aj Egipto cha, man̈x 'ic stac' yu'n eb' a'.

⁴⁵ 'Ix ya'n pax cot e no 'us yet' e no pajtza 'a scal eb' 'aj Egipto cha, sec tzyab' eb' syal yuj e no';

⁴⁶ 'ix ya'n 'och e no c'ulb' 'a scal yawb'en eb', c'uxn xlajw 'el smasnil smunljel eb' yuj no'.

⁴⁷ A q'uen sacb'at, yet' q'uen che'ew, a q'uen satn 'el te higo yet' te uva 'awb'il yuj eb'.

⁴⁸ C'uxn xcham swacx eb' yet' scalnelu eb' yuj q'uen sacb'at cha, yet' yuj raya.

⁴⁹ 'Ix ya' cot Dios yowl sc'ojol yet' sc'a'lc'ojlal 'a yib'n̈ eb' 'aj Egipto cha, yuj cha, 'ix schecn cot yailal, somc'ojlal yet' chamel.

⁵⁰ A Dios caw tojl xoj ya'n cot yowl sc'ojl 'a yib'n̈ eb'. Man̈x 'ic yac' niwnc'ojlal 'a eb', palta 'ix 'ajx 'och eb' 'a yol sc'ab' chaml yu'uj.

⁵¹ 'Ix smiln cham eb' b'ab'l 'unin, c'uxn xcham sb'ab'l 'unnal junjn n̈al eb' 'aj Egipto cha.

⁵² Ax eb' qui mam quichmec, 'ix 'ijx b'ey eb' yuj Dios 'a cusltac lu'um. 'Icha wal tzyutj junc 'ilm calnelu yi'n b'ey nan̈loc no calnelu 'a yol b'e, 'ixta xyutj eb'.

⁵³ 'Ix yij b'ey eb' wal 'a caw wach', sec matz xiw eb'. Palta ax eb' 'ajc'ojl yajch 'a eb', 'ix mucchj can eb' yuj a mar.

⁵⁴ A Dios x'i'n cot eb' qui mam quichmec chi 'a jun lum sic'b'il 'el yu'uj, yuj spoder xya'n ganar yi'n can 'ec' eb' lum jolmctac witz 'a scal owal.

⁵⁵ 'Ix yi'n can 'el jun tzo'n̈ eb' 'anma chuc chon̈b'al 'a yojltac eb' qui mam quichmec cha. Junjn petn̈ xyutj spojn can 'ec' lum lum chi 'a junjn 'in̈tal eb'. 'Ix can cajn eb' qui mam quichmec chi 'a slum eb' chuc chon̈b'al cha.

⁵⁶ Palta a eb' qui mam quichmec cha, 'ix spitj sb'a eb 'a qui Diosalec to caw niwn yel'chi. Xmeltzj 'och eb' 'a 'a, man̈xtoc syiclj eb' schecnb'il.

⁵⁷ Lajn wal xyutj sb'a eb' 'icha eb' smam yichm eb'. 'Ix yij 'el sb'a eb' 'a stz'ey Dios, man̈x yiclumoc xyutj sb'a eb' 'a 'a. Man̈x wach'c xyutj sb'a eb', lajn xoj eb' 'icha junc jul-lab' to coxo.

⁵⁸ 'Ix stzuntzj cot eb' yowl sc'ojl Dios yuj jun tzo'n̈ smacsej eb' 'ayc' 'a jolmctac witz, xyaln sb'a eb' 'a jun tzo'n̈ yechel.

⁵⁹ Caw xcot yowl sc'ojl Dios yic xyiln jun tzo'n̈ cha. Yuj cha, xyi'n can 'el eb' quit israelal chi 'a sc'ojol,

⁶⁰ 'ix yactn can jun scajnub' 'a Siló, atn jun yatut yaj 'a qui calec.

⁶¹ Schan sc'ojl Dios yec' te scaxail trato yuj eb' 'ajc'ojl cha, atn te tzch'oxn 'el stzictznial yet' spoder.

⁶² Caw yelc'ojlal ow 'a eb' schon̈ab', yuj cha, xya'n can 'och eb' 'a yol sc'ab' owl yet' eb' 'ajc'ojl cha.

⁶³ A eb' quelmtac, 'ix cham eb' 'a scal owal, atn jun owl lajn 'icha c'ac'; toc 'ayt mach tznupn yet' eb' 'ix cob'es.

⁶⁴ 'Ix cham eb' ya'mal 'och sti eb' 'anma 'a Dios yuj owal, ax eb' 'ix yistzil ewinac, man̈x 'ic stac' yoc' eb' 'ix yuj ewinac.

⁶⁵ Xlajw cha, 'ix jaw tza'njoc Cajlilec 'icha junc soldado tz'el te 'an̈ 'a sat. Caw wal tz'el yaw ya'n owal.

⁶⁶ 'Ix satn 'el eb' 'ajc'ojl yajch 'a 'a, x'at eb' 'elc yu'uj, 'ix ya'n q'uixwc 'el eb' 'a jun 'ejmn̈ej.

⁶⁷ A yic si'n 'elt Dios jun mach xjucb'tzan eb' schon̈ab', 'ix spatquiln can 'el eb' yin̈tl Efraín win yunnal José

⁶⁸ palta a 'a eb' yin̈tl Judá 'ix sic' 'elta. Si'n pax 'el lum tzaln Sión caw chamc'ojlb'il yu'uj

⁶⁹ ata sb'o chan̈ jun scajnub' caw niwquil x'aji, x'at 'a cha'an̈. 'Ix ya'n can 'ejm yipnub' yich 'a jun 'ejmn̈ej, 'icha stzatzl yaj lum lum tic.

⁷⁰ Si'n 'elt jun schecab' atn win David, win 'ilm calnelu.

⁷¹ 'Ix yi'n 'el Dios win 'a 'ilj calnelual cha, ax eb' schon̈b' chi 'ix ya'cn yila'. 'Ix 'ochcn win yilmalc eb' yin̈tl can Israel.

⁷² Sjucb'tzej win eb' schon̈b' Dios 'a smasnil sc'ojol, 'ix stan̈wj win eb' 'a swach'il yet' 'a stojlal.