Salmos 75 - Chuj San Sebastian Bible

SALMO 75 A Dios atn Juez

Sb'it win Asaf jun tic, tzc'anlb'ej junc mach tzjucb'tzan b'it

¹ Ach qui Diosal on̈, tzcal yuj diosal 'aych 'a smasnil qui c'ojol, tzqui b'inej a munljel to satjub'tac yilxi.

² Mamin Jehová ach tzal 'ixtic: A wal yic 'oj c'och jun tiempoal sic'b'il 'el wu'uj, caw tojl 'oj wutc in b'eyc'ojlan eb' 'anma'.

³ Wach'xam 'oj 'ib'xoc lum lum tic yet' smasnil tas cajn 'a sat, an 'oj wac' yip smasnil yipnub'al yich lu'um.

⁴ Tzwal 'a eb' tzb'an̈ sb'a, yet' 'a eb' maysch'olnil tas tzb'o'o, to matz tac' sb'an̈n sb'a eb', matz tac' pax yi'n chan̈ sb'a eb'.

⁵ Matz b'inax cab' eb' yuj tas tz'el sb'oni, man̈ cab' sb'an̈ sb'a eb' spaxtini, xa chi.

⁶ Yujto a yic tz'ijx q'ue'ch junc 'anma', man̈oc 'a eb' 'anma 'ay 'a stojlal 'aj tzq'uel c'u, man̈oc 'a eb' 'ay 'a stojlal 'aj tz'em c'u, man̈oc pax 'a eb' 'ay 'a cusltac lum tzcot jun cha,

⁷ palta a Dios atn Juez. 'Ay eb' tzyij 'ejmi, 'ay pax eb' tzyij cha'an̈.

⁸ Yujto a Jehová caw wal 'ay yowl sc'ojol, lajn 'icha junc vaso b'ut'n yet' yal uva to jawnacx sti'. A wal yic 'oj ya'n cot yowl sc'ojl chi 'a yib'n̈ smasnil eb' maysch'olnil sb'eyb'al 'a sat lum lum tic, c'uxn 'oj jawc 'a yib'n̈ eb' smasnil.

⁹ Palta an tic, 'oj waln̈j 'el yab'xil qui Diosal an̈ yin̈tl on̈ Jacob tic, ax in b'itn yet' in wach' paxti 'a 'a.

¹⁰ A 'oj satnc 'el sb'an̈quinal eb' maysch'olnil, ax ya'n niwtjoc sjelnal eb' wach' sb'eyb'al.