Salmos 74 - Chuj San Sebastian Bible

SALMO 74 Lesl yic tzcolchj 'el eb' chon̈ab'

A jun tic sb'it Asaf

¹ Ach qui Diosal on̈, ¿tas yuj on̈ actj can qui ch'ocj 'a jun 'ejmn̈ej? ¿Tas yuj caw tzn̈ilchj chan̈ yowl a c'ojl 'a yib'n̈ jun a chon̈b' tic?

² Nan̈ cot an̈ a chon̈b' on̈ tic on̈, to ach b'ojnacn̈ 'a yictax pecti'. On̈ a coln can 'eli, yic tzon̈ 'och yiclumal 'aych on̈. Na cot lum tzaln Sión, lum 'aj caj ach 'eq'ui.

³ Cotan̈, wul 'ilt jun tzo'n̈ xjuw can 'el 'a jun 'ejmn̈ej tic; a eb' 'ajc'ojl 'ix ma'n can juwc smasnil tas 'ay 'a yol a cajnub'.

⁴ Ach qui Diosal on̈, a eb' 'ajc'ojl yajch 'ayach, tzya'l eb' yaw yet' tzaljc'ojlal 'a yol a cajnub' 'aj qui chajnac qui b'a et'oc. Ax sbandera eb' chuc chon̈b'al a 'ix yac'q'ue eb' ta'.

⁵ Lajn wal sc'an̈ eb' 'icha eb' c'atztzum 'a scal te niwc te'.

⁶ A yet' q'uen ch'acab', yet' martillo 'ix smac' poj eb' te 'a'nte 'aych 'a yol a cajnub'.

⁷ 'Ix ya'n 'och eb' sc'a'l a cajnub'; caw xjuw 'el 'aj caljnac qui b'a 'aych on̈, x'em b'uln̈ can 'a sat lum yuj eb'.

⁸ Snib'j eb' on̈ satl qui masnil on̈. C'uxn xya'ch eb' sc'a'l smasnil lugar 'a yol qui chon̈ab', 'a 'aj qui yamjnac qui b'a yic ca'n 'emmquilal 'aych ach qui Diosal on̈.

⁹ Man̈x 'aj wach' quiln junc senya, man̈x 'a junc a checab', mant cojcoc pax on̈, jantcto tiempo 'oj yac' jun tic.

¹⁰ Ach qui Diosal on̈, ¿b'a'n̈to wal 'oj 'och wan eb' 'ajc'ojl on̈ stzuntzn on̈? ¿B'a'n̈to wal 'oj 'och wan sb'uchwj eb' 'ayach?

¹¹ ¿Tas yuj tza c'ub'j 'el a poder 'ayn̈ on̈? ¿Tas yuj matz ac' 'ip a satn 'el eb'?

¹² Palta yictax pecti', qui Reyl xon aj on̈; til wal 'ajtil 'ix ac' ganar owl 'a sat lum lum tic.

¹³ Ach xa pojcn snan̈l a mar yet' a poder, xlaj a ma'nc poj sjolm no niwc noc' 'ay 'a yol a mar cha,

¹⁴ 'ix a te'cn 'ejm sjolm no niwquil Leviatán, xa'n can schi e no chiwjum noc' 'ay 'a cusltac lu'um.

¹⁵ Ach xac' q'ueloc a a 'aj tzlaj paq'ui, yet' eb' a tzb'eyi, xa'n pax tup 'ejm a niwc a may xon 'aj tztupi.

¹⁶ Ach 'ay ec c'ual yet' 'ac'wal, ach a b'ojnac can 'uj yet' c'u.

¹⁷ Ach a'jnac can 'ejm stz'acan̈il 'aj tzlajw c'och yolyib'n̈q'uinal; ach aljnac cani to 'ay cuaresma yet' n̈ab'lq'uinal.

¹⁸ Mamin Jehová, na coti chajtlto a eb' 'ajc'ojl yajch 'ayach, caw tzach stzuntzj eb', tzlaj yal eb' tu paxti 'ayach, tzach sb'uchn pax eb'.

¹⁹ Man̈ ac' sat a c'ojl 'ayn̈ on̈. Yujto an̈ tic on̈, caw c'un on̈ 'icha no cowojte', man̈ on̈ ac' 'a yol sc'ab' eb' 'ajc'ojl lajn 'icha no chiwjum noc'.

²⁰ Na cot a trato a'jnac quet' on̈, yujto a 'a smasnil qui chon̈b' on̈, 'ayn̈j yet'l eb' tzb'on maysch'olnil.

²¹ Man̈ a cha 'ixtxoc eb' 'emnc sc'ojlani, sec a eb' meb'a' yet' eb' 'emmquilal yeq'ui, 'oj yal eb' wach' paxti 'ayach.

²² Ach qui Diosal on̈, col eb' ec xo yaji. Na coti chajtlto a eb' tu snab'en, caw tzach stzuntzjn̈ej eb'.

²³ Man̈ ac' sat a c'ojl 'a eb' tzmeltzj 'och 'ayach, caw tzq'ue somnjoc eb' yel yaw.