Salmos 73 - Chuj San Sebastian Bible

LIBRO 3 (Salmos 73—89 ) SALMO 73 A swach'c'ojlal Dios

A jun tic sb'it win Asaf

¹ Caw yel wach' snab'en Dios 'a 'ayn̈ an̈ israel on̈c tic, yet' 'a eb' to tojl yaj snab'en.

² An tic, caw jab'xoj ma'in telw 'ejm 'a maysch'olnil.

³ Yujto caw xchichn chan̈ in c'ojol yic xwiln laj sq'ue'ch eb' b'an̈quintac, yet' eb' maysch'olnil sb'eyb'al.

⁴ Toc 'ay chaml tzjaw 'a yib'n̈ eb', caw wach'n̈j sc'ojl eb';

⁵ may yailal tzjaw 'a yib'n̈ eb', may 'ajtil tzoyb'x 'ec' eb' yuj meb'a'il, 'icha tzyac' jun tzo'n̈ xo 'anma'.

⁶ A sb'an̈quintacl eb' cha, checl yilx 'a eb' 'icha junc ton̈; ax maysch'olnil tzlaj sb'o eb', checl 'a eb' 'icha junc pichl 'aych yuj eb'.

⁷ Jab'xoj checl yol sat eb' yuj sb'a'chil, yel xo wal niwn smaysch'olnilal eb'.

⁸ Yuj sb'an̈quintacl eb', tzb'uchwj eb', tzyixtn eb' yit 'anma'il, matz q'uixw eb' xib'tn eb'.

⁹ Tu tzyal eb' 'a Dios 'ay yic satcha'an̈, tzpechx b'eyc'oc eb' 'anma 'a sat lum lum tic yuj eb'.

¹⁰ Yuj cha, ax yoch tza'n eb' 'anma yuj eb', ax schan eb' 'anma chi yab' tas 'oj laj yal eb'.

¹¹ Tzyaln eb' 'ixtic: A Dios niwn ton yel'chi, palta ¿tom 'oj yojcoc 'el tas tzqui b'o'o? xchi eb'.

¹² 'Iltec wal nab'n jun tzo'n̈ maysch'olnil sb'eyb'al tic. May xon wal jac tzna eb', caw tzq'ue'ch eb' yet' sricoal.

¹³ An xo tic, toc 'ay jac xwac' ganar yic cob' wach' xwutj in b'eyb'al, yet' yic xin yamn 'och wan in b'a 'a smasnil maysch'olnil.

¹⁴ Junjn c'u tzin ma'xi, 'a junjn sq'uin̈b'ial tzwi'n tz'u'um.

¹⁵ Mamin, q'uinloc 'ixta xwutj in nan 'icha eb' cha, toto 'ixta', tecn xwixtj am eb' a chon̈ab'.

¹⁶ Xin nib'j to xnachj 'el jun tic wu'uj, palta caw 'ajltac 'ayin.

¹⁷ At 'a yic in c'och 'a a cajnub' ach in Diosal, 'ix nachj 'el wu'uj 'ajtil 'oj lajwc c'och eb' cha.

¹⁸ 'Ix a'cn 'och lin̈n eb' 'a 'ajtil caw n̈el-li, xa'n can 'at eb' 'a 'ajtil 'oj juwc 'eli.

¹⁹ Wal 'a yajn̈ej ax satl eb', scal xiwc'ojlal 'oj lajwc 'el eb'.

²⁰ Ach Wajlil, 'oj a patquilc can 'el eb' maysch'olnil tas tzb'o'o. 'Icha tz'aj sat sc'ojl junc mach 'a swayich yic tz'el swayan̈, 'ixta 'oj 'ajcn eb' o'oj.

²¹ A yic mantzac nachj 'el jun tic wu'uj, caw 'ay in somc'ojlal, pitz'n 'ochn̈ej yailal 'a in pixan.

²² Caw matz nachj 'el xon jac wu'uj, 'icha wal junc no noc' may snab'en, 'ixta 'in 'a ojltac.

²³ Palta an tic, 'aynn̈ej 'ec' et'oc, quetzb'iln oj yet' a wach' c'ab'.

²⁴ In a cuy 'a wach' b'eyb'al, ax 'a slajub' caw wach' 'oj otc in a chani.

²⁵ ¿Toc 'ay junc xo mach 'a satchan̈ 'aj tzwa'ch in nab'en? Cojn ach toni. A yic 'ayn xo 'ec' et'oc, man̈x 'a tas 'oj in nib'c 'a sat lum tic.

²⁶ Ach in Diosal, wach'xam tz'el yip in niwnal, palta ax 'aych tz'ilchj smasnil tas tzin nib'j 'a smasnil tiempo, tza'n pax in te'nal.

²⁷ A eb' tzyij 'el sb'a 'a a tz'ey Mamin, 'oj cham eb'. A eb' man̈ yiclumoc 'ayach, 'oj a satl eb'.

²⁸ Palta an xo tic ach in Diosal, tzin nitz 'ochch in b'a 'a a tz'ey, yujto a jun chi yel xo wach' 'ayin. Mamin Jehová 'aychn̈ej 'och yipc in c'ojol, 'oj wal-l yab'xil smasnil tas wach' a b'ojnac.