Salmos 71 - Chuj San Sebastian Bible

SALMO 71 A slesl jun 'ichm 'anma'

¹ Mamin Jehová a 'aych tzin col in b'a, may cab' b'a'n̈ tz'el in q'uixwel.

² Caw colwjan̈ wet' muc'uc, coln 'el yet' a tojlal, maclj wal ab' tas tzwala.

³ 'Ochn̈ wen̈loc 'icha junc n̈aq'ue'en, an̈j 'aych tzin col in b'a 'a junjn 'ejem. Ach aljnac to tzin a col-li, yujto 'icha cuartel, 'ixta aj 'ayin.

⁴ Ach in Diosal, coln 'el 'a yol sc'ab' eb' maysch'olnil sb'eyb'al, atn eb' milm cham 'anma', yet' eb' maysch'olnil snab'en.

⁵ Mamin Jehová, yictax in cot'ch quelmal, toxn yipc'ojlal aj wu'uj.

⁶ Yic 'aynto 'ec' 'a yol sc'ojl in nun, toxn a 'aych tzwij wip. Ach in ac' 'aljoc. 'Oj ach in b'itnoc 'a smasnil tiempo.

⁷ Til wal eb' xnachj 'el yu'uj, yujto 'ix yil eb' chajtlto ach xin a colcn 'eli.

⁸ Smasnil c'u tzach in b'itnej, yic tzwi'n chan̈ a b'i.

⁹ Man̈ in a patquilc can 'eli, yujto 'ichm in xo. Man̈ in actc cani, yujto man̈x 'a pax wip.

¹⁰ A eb' 'ajc'ojl yajch 'ayin, eb' tzin nib'n milnc chamoc, tzlaj say eb' yitb'eyum, junxn̈ej tz'aj eb', tzmol aln eb' tas tzin yutj eb'.

¹¹ Tzyaln eb' 'ixtic: Qui pechc b'eyc'oc, tzqui yamnec coti, man̈x 'ayc 'och Dios yet'oc, man̈x 'a mach tztac' scolni, xchi eb'.

¹² Ach in Diosal man̈ e'l a b'a 'a in tz'ey. Cotn̈ muc'uc, colwjan̈ wet'oc.

¹³ A eb' 'ajc'ojl yajch 'ayin, q'uixw cab' can 'el eb', sat cab' can 'el eb'. May cab' jac yel'ch tz'ajcn eb' tznib'n b'onc tas tu 'a in patic.

¹⁴ An xo tic, 'aych 'och yipc in c'ojl 'a smasnil tiempo, caw 'oj ach in b'itnocn̈ej.

¹⁵ Smasniln̈ej c'u 'oj wal-l ab'xil, chajtlto ach tic caw tojl ach, ach in a col-li. Wach'xam to matz nachj 'el wuj smasnil, palta 'oj wal-li.

¹⁶ Mamin Jehová, a wal jun tzo'n̈ tas niwn yel'ch a b'ojnac, caw 'oj wal-l yab'xil. Ax waln 'el paxi chajtlto cojxn̈ej ach ton tojl ach.

¹⁷ Ach in Diosal, in a cuyu yictax quelm in 'unin, ax ticnec an̈j 'ijnoc waln 'el jun tzo'n̈ a niwn munljel caw satjub'tac yilx b'ob'il can o'oj.

¹⁸ Man̈ in actc can in ch'ocoj, wach'xam 'ichm in xo, sacx xil in jolom, palta an̈j 'ijnoc 'oj wal-l a jelnal, yet' a tojlal 'a eb' tot 'oj 'aljoc.

¹⁹ A wal a tojlal ach in Diosal, caw tzq'ue'ch 'a satcha'an̈, caw niwn yel'ch jun tzo'n̈ tas a b'ojnac. May junc xo mach 'icha 'ach.

²⁰ Wach'xam til wal yailal 'ix a ch'ox wila', yet' pax cusc'ojlal, palta 'oj in a'x pitzwoc jun 'ejm xo; 'oj in e'x q'uet 'a yol lu'um,

²¹ ax in a'n q'ue'choc wal si'mb'il, ax a'n pax sniwnal in c'ojol.

²² An xo tic, 'oj wal wach' paxti 'ayach. A wal a tojlal, 'oj in b'itnoc yet' arpa yet' pax salterio. Ach tic in Diosal ach, Cojxn ach toni.

²³ 'Oj in tzalj ach in b'itnani, yujto ach in a colo.

²⁴ 'Oj wal-l pax a tojlal 'a junjn c'u, ax eb' tznib'n b'onc tas tu 'a in patic, somchj cab' 'el eb', q'uixw cab' pax 'el eb'.