Salmos 7 - Chuj San Sebastian Bible

SALMO 7 A Jehová tojl tzyutj sb'eyc'ojlwi

Sb'it David jun tic 'a Jehová yuj tas 'ix yal win Cus, win yin̈tl can Benjamín

¹ Mamin Jehová in Diosal ach, caw tzach wa'ch yipc in c'ojol. Coln 'el 'a yol sc'ab' smasnil eb' tzin pechn b'eyc'oc.

² Yujto lajn eb' 'icha no león yic ch'iychtan no schib'ej. Comnoc matz in ac' sch'iychtoc 'at eb', yujto may junc xo mach tztac' in scolni.

³ Mamin Jehová in Diosal ach, may 'aj 'ix 'och in mul, toc 'ay eb' xwa'ch chaml 'a yib'an̈.

⁴ Toc wal 'ay 'aj tu xwutj in b'a 'a eb' wach' xyutj sb'a 'ayin. Toc 'ay 'aj 'ix wixtj eb' 'ajc'ojl yajch 'ayin, 'a yic may jac smul eb' tz'och 'ayin.

⁵ Toto 'ay eb' xwixtej, to 'ixta', ya' cab' eb' snab'en in spechn b'eyc'oc. Yamchjquin cab' yuj eb'. Sjucquin cab' eb' 'a sat lu'um, ste'wtan̈c in cab' eb', masnto tzin mucchji.

⁶ Mamin Jehová cotn̈ yet' yowl a c'ojol, 'ac' sat yowl sc'ojl eb' 'ajc'ojl yajch 'ayin. B'onyaj wal 'a stojlal 'icha tza nib'ej.

⁷ 'Och cab' oyn jun tzo'n̈ nacion̈ 'ayach; a cab' 'a 'aj 'ay a despacho 'a satcha'an̈, ata cab' tzach 'em wocn a b'eyc'ojloc eb'.

⁸ Mamin Jehová, ach tza b'eyc'ojlej cab' junjn nacion̈. B'eyc'ojlej in, a tzyal tas yilx in yiclumal 'ayach, yet' tas yilx in wach' b'eyb'al 'a ojltac.

⁹ Yujto Dios ach, caw tojln̈ej a nab'en; ojtac tas yaj snab'en eb' 'anma', yet' tas c'ultac yaj 'a snab'en eb'. Sat cab' 'el eb' maysch'olnil sb'eyb'al, palta ax eb' wach' sb'eyb'al, 'ac' ste'nal eb'.

¹⁰ A Dios in Colmal yaji, caw tzcolx eb' tojl snab'en yu'uj.

¹¹ Atn Juez caw tojol; 'a junjn c'u caw ow 'a yib'n̈ eb' tu sb'eyb'al.

¹² Toto matz na sb'a jun tzo'n̈ 'anma cha, to 'ixta', 'oj sn̈ic Dios yespada; caw wach'x pax yaj sjul-lab'.

¹³ An̈jtona wan sb'on 'och sc'a'l sjul-lab' cha, wach'x yaj syamc'ab' yic owl to 'oj 'och chaml yu'uj.

¹⁴ 'Iltec wal eb' tzb'on maysch'olnil, tzna chan̈ eb' tas tu 'a spatc yit 'anma'il. Tzyamn 'och eb' ya'n 'es 'a eb', cojn 'ixtj 'anma tzb'o eb'.

¹⁵ Caw xab' yich jun sjul eb' sb'ojnac, palta a 'a yol jun sjul eb' cha, ata 'oj 'atcn eb'.

¹⁶ A smaysch'olnilal yet' stu b'eyb'al eb', a 'oj cotcn 'a yib'n̈ eb'.

¹⁷ 'Oj wal wach' paxti 'a Jehová, yujto caw tojl snab'en. A Jehová caw niwn yel'chi, 'oj in b'itnoc jun tzo'n̈ b'it 'a 'a.