Salmos 69 - Chuj San Sebastian Bible

SALMO 69 Jun 'aw yic cusc'ojlal

Sb'it David jun tic tzc'an junc mach tzjucb'tzan b'it

¹ Ach in Diosal coln 'eli, yujto 'icha wan in 'at 'a yich jun a niwn a'.

² 'Icha to wan in 'at 'a scal jun yaxlum caw xab' yich, may 'aj wach' scan te'n woc. 'Icha tox in 'ejm 'a snajtil xab'l yich a', wan xo in scuchn b'ey a tzwab'i.

³ Caw 'ix poj yol in jaj wawji, xq'ue syal yol in jaj. Caw 'ix c'unb' c'och yol in sat yuj in macn wil a jaw ach in Diosal.

⁴ 'Ec'b'al sb'isl eb' tzcomn chichn 'och 'ayn 'icha sb'isl xil in jolom; caw xjelnb'i eb' 'ajc'ojl yajch 'ayin. Wach'xam may in mul, palta tznib'j eb' tzin smil chamoc, tznib'j eb' tzc'an meltzjoc tas 'ayn 'a nab'an̈ej, palta may tas wel'jnac.

⁵ Ach in Diosal, ojtac chajtlto caw pit in, matz tac' in c'ub'n 'el in mul 'ayach.

⁶ Mamin Jehová tzta'n̈j oj smasnil. A wal eb' tzach 'a'n 'och yipc sc'ojol, comnoc matz q'uixw 'el eb' yuj in mul tz'ochi. An̈ israel on̈ tic on̈, caw yel qui Diosal ach on̈, a wal eb' tzyac' 'ejm sb'a 'ayach, comnoc matz somchj sc'ojl eb' yuj in paltail.

⁷ O'oj, 'ix techj wab'n syal jun tzo'n̈ b'uchwal paxti', macn xoj in sat tzin 'ec' yuj q'uixwc'ojlal.

⁸ 'Icha xoj comn 'anma waj 'a eb' wu'tac, caw man̈ in 'ojcab'ilc yuj eb', tic pax to junn̈j in nun yet' eb'.

⁹ Caw pitz'n 'och 'a in c'ojl in ya'iln atut, a wal yic tzb'uchwj eb' 'anma 'ayach, caw locn in tzwab' syail.

¹⁰ A yic tzin 'oq'ui, yic tzin 'och pax 'a c'ajb'c'ojlal, caw tzlaj b'uchwj eb' 'anma 'ayin.

¹¹ Toto a 'in pichl n̈achtac sat tzwa'ch yuj cusc'ojlal, caw wal tzetztac xoj wilx 'a scal eb' 'anma smasnil.

¹² An xoj tzin yalb'tan̈j eb' wocn 'ec' 'a sti spuertail chon̈ab', ax eb' 'u'm 'an̈, tzin laj sb'itnoc eb'.

¹³ Palta an xo tic Mamin Jehová, a 'aych tzin leslwi. Ach in Diosal colwjan̈ wet' ticnec. Caw niwn a chamc'ojlal, ta'wj in yujto 'aych 'ochn̈ej wet'oc, yuj cha, coln 'el ticnec.

¹⁴ Coln 'el 'a yol sc'ab' eb' tzin chacn 'eli. A stu nab'enal eb', lajn 'icha b'iq'uich, mto 'icha junc a a caw xab' yich. Man̈ in a cha 'ijxoc 'at yu'uj.

¹⁵ Man̈ in a cha 'ijxoc 'at yuj jun 'icha a 'elmal a cha. Man̈ in a cha 'atcn 'a jun 'icha xab'l yich a', yic tzin satcn 'ejm ta'.

¹⁶ Mamin Jehová ta'wj in, caw 'ay a chamc'ojlal 'a smasnil tas. 'Ochn̈ q'ueln 'ayn yet' a chamc'ojlal.

¹⁷ Man̈ in a patquilc can 'el an a checb' in tic, ta'wj in muc'uc, yujto 'ayn 'ec' 'a scal tas 'ay smay.

¹⁸ Cotn̈ 'a in tz'ey, coln 'el 'a eb' 'ajc'ojl yajch 'ayin.

¹⁹ Ojc wal eb' tzaln b'uchwal paxti 'ayin. In juw 'el yuj eb', q'uixwc'ojlal xoj wec' yuj eb', atn eb' 'ajc'ojl yajch 'ayin.

²⁰ Yuj wal jun tzo'n̈ b'uchwal paxti cha, yuj cha, a tzwutj wab'ni to xjat in pixn yab'n syail; man̈x in 'anma'oc, man̈x 'a pax wip. Nab'an̈ej 'ix in say mach tz'a'n sniwnal in c'ojol, yet' mach tz'o'ch sc'ojl 'ayin.

²¹ 'Ix yac' 'ejm eb' veneno 'a scal tas tzin c'uxu, ax yic xtacj in ti', xya'n eb' wuc' vinagre.

²² A wal jun tzo'n̈ sq'uin̈ eb' tzlaj ya'chi, meltzj cab' 'och 'a eb' 'icha junc ch'an̈ ya'al, juw cab' 'el eb' yu'uj. 'Och cab' yailal spacc 'a eb'.

²³ 'Och cab' 'a sat eb' yuj 'a jun 'emn̈ej. 'Icha cab' junc winc tzquilx 'ejm n̈ojn yuj tas tzcuchu, 'ixta cab' tz'ajcn eb' 'a smasnil tiempo.

²⁴ 'A' cot yowl a c'ojl 'a yib'n̈ eb', yamchj cab' eb' yuj a c'a'lc'ojlal.

²⁵ Can cab' yatut eb' 'a cusltaquil, man̈x 'a cab' mach tzcajni.

²⁶ Tzin spech b'eyc'oc eb' an tzin ac' cus tic, tzin sb'uchn pax eb' an tzin ac' lajwc tic.

²⁷ A eb' tu tas tzb'o tic, 'a'ch jun tzo'n̈ xo tic stzacb'oc smul eb'. Man̈x 'a cab' yaln eb' yic 'a colnb'il tzac'a.

²⁸ Suc sat sb'i eb' 'a ch'an̈ libro yic q'uinal. Man̈ a tz'ib'c can 'ejm sb'i eb' chi yet' eb' tojl sb'eyb'al 'a ojltac.

²⁹ An xo pax tic, yan̈j waji, cusc'ojlaln̈ej pax waji. 'Ij in cha'an̈, tzin a coln 'el ach in Diosal.

³⁰ 'Oj wal wach' paxti yet' in b'it 'a sb'i in Diosal. Caw 'oj wal yuj diosal 'a yet' in b'it.

³¹ Caw 'oj tzaljoc sc'ojl Jehová yab'n in b'it, 'a yib'n̈ pax to a junc no mam wacx may spaltail tzwac' xajmb'al-l 'a 'a.

³² A yic 'oj 'ilxoc jun tic, caw 'oj tzaljoc sc'ojl eb' 'ay scusc'ojlal. Toto 'oj yal sb'a eb' 'a in Diosal, 'oj yac' ste'nal snab'en eb'.

³³ A Jehová, schaj yab' tas tzyal eb' meb'a', matz patquilj can 'el eb' yic 'aych 'a preso.

³⁴ A satcha'an̈, yet' lum lu'um, a mar, yet' pax smasnil tas cajn 'a junjn c'aj, yal cab' eb' wach' paxti 'a Dios.

^35-36 A 'oj colnc 'el Sión, ax sb'on pax chan̈ chon̈b' Judá jun 'ejm xo. Ax yin̈tl eb' schecab', a eb' 'oj cajnc jun chon̈b' cha. Ata 'oj cann̈j cajn eb', ax yoch eb' 'aj chon̈b'al ta', atn eb' 'ay schamc'ojlal 'a 'a.