Salmos 68 - Chuj San Sebastian Bible

SALMO 68 B'it yic x'ajx ganar owal

Sb'it David jun tic tzc'an junc mach tzjucb'tzan b'it

¹ Toto a Dios tz'och 'a'j owal, caw sactzicnac s'atcn eb' 'ajc'ojl chi yu'uj. Ax eb' tzchichn 'och 'a 'a, tz'at eb' 'elc 'a yojltac.

² 'Icha wal tz'aj satcn 'at tab' 'a scal 'ic', 'ixta tz'aj eb' satcn 'ati. Tz'ulb'x 'ejm eb' 'icha tz'aj yulb'x 'ejm no chab'ic' yuj c'ac'; 'ixta wal 'oj 'aj satcn 'el eb' maysch'olnil sb'eyb'al 'a yojltac Dios.

³ Palta ax eb' wach' sb'eyb'al, caw 'oj tzaljoc eb' 'a yojltac Dios. 'Oj b'atjoc chan̈ eb' yuj tzaljc'ojlal.

⁴ B'itn coyc 'a Dios, qui b'itquec b'it 'a sb'i. Calc wach' paxti 'a jun mach tz'ec' 'a yib'n̈ 'asun, atn Jehová. Tzalj coyc 'a sb'i. Caw tzalj coyc 'a yojltac.

⁵ A Dios cajn 'ec' 'a yol scajnub', jun to yicn̈ej yaj sch'ocoj. A 'aych smamc eb' meb'a 'unn chamnc smam, scolmal pax eb' 'ix chamnc yichmil.

⁶ A eb' tz'ec' sch'ocoj, a Dios tz'a'n 'aj wach' scan cajn eb'. Ax eb' tzyamchj can 'at 'icha presoal yuj owal, tzcolx 'elt eb' yu'uj, tzlajw cha, tzya'n q'ue'choc eb'. Palta ax eb' tu snab'en, a 'a lum tacn̈ lum 'oj can cajn eb'.

⁷ Ach qui Diosal on̈, a wal yic ach 'elt 'a yojltac eb' a chon̈ab', 'ix a yamn 'och b'eyl yet' eb' 'a lum cusltac lu'um.

⁸ A yic cha, caw x'ib'x lum lum o'oj, 'ix cot n̈ab' 'a satcha'an̈. X'ib'x lum tzaln Sinaí 'a ojltac ach qui Diosal an̈ israel on̈ tic on̈.

⁹ Man̈x jantcoc n̈ab' 'ix a' coti, sec tzya'xb' pax sat lum tacn̈ lum jun 'ejm xo.

¹⁰ Atn lum 'aj 'ix 'ec' cajn eb' a chon̈ab'. Yuj wal a wach'c'ojlal ach qui Diosal on̈, yuj cha, 'ix a'n tas tzc'ux eb' meb'a'.

¹¹ Ach Cajlil on̈, a yic 'ix alni to tz'ajx ganar eb' 'ajc'ojol, til wal eb' 'ix 'ix x'aln 'el 'ixtic:

¹² A eb' rey caw tz'at eb' 'elc yet' soldado, ax eb' 'ix 'ix xlaj can 'a yatut, wan spojn 'ec' eb' 'ix tas x'at to'xoc can 'ec' 'a eb' 'ajc'ojl cha,

¹³ atn jun tzo'n̈ yechl no 'uch 'u'nc sc'axl yuj q'uen plata yet' q'uen oro. ¿Tas yuj 'ayx ma'ix eyactj eyiln no e calnelu yic tzex 'at eyac' owal? xchi eb' 'ix.

¹⁴ Ach tic Dios ach, tztac' oj smasnil. A yic x'at eb' rey chi 'elc o'oj, 'ix pucb't eb' 'a sat lu'um, 'icha tz'aj yem q'uen chew 'a lum witz Salmón.

¹⁵ Man̈x jantcoc schan̈il yajb't stel lum switzl Basán, man̈x jantcoc swach'l yilx swon̈quixtacl sjolm eb' lu'um.

¹⁶ Ax cajn ex 'a eb' lum jolmctac witz cha, ¿tas wal yuj tzex cot q'ueln yet' e chichnc'ojlal 'a jun witz 'ix si'cn 'el Jehová Dios yico'oc, yic tzcan cajn 'a jun 'ejmn̈ej ta'?

¹⁷ A Dios smiyon̈al xo sb'isl scaruaje yic owal; ata xcot 'a yol scaruaje 'a Sinaí, 'ix jaw 'a scajnub'.

¹⁸ A Dios 'ix q'uecn 'a satcha'an̈, xyi'n 'at eb' 'icha preso yaji. Schan siylab' eb' 'anma', an̈jtona eb' tenmtac, xya' pax eb' yico'. A Jehová Dios 'oj can cajn ta'.

¹⁹ Calc wach' paxti 'a Cajlil, atn qui Diosalec, qui Colmalec paxi; yujto 'a junjn c'u tzon̈ stan̈wniec 'a swach'ilal.

²⁰ A qui Diosalec, atn qui Colmalec paxi. A Jehová Cajlilec tic, tztac' on̈ scolnec 'el 'a yol sc'ab' chamel.

²¹ A Dios 'oj ma'nc poj sjolm eb' 'ajc'ojl yajch 'a 'a, atn eb' an̈ja sb'on maysch'olnil.

²² A Cajlilec a 'ix aln 'ixtic: A 'a lum Basán, ata 'oj wi'x cot eb' 'ajc'ojol, ax wi'n cot pax eb' 'a a mar caw xab' yich,

²³ sec 'oj e b'on̈ eyoc 'a schic'l eb' 'ajc'ojl cha, ax sle'n pax e no e tz'i schic'l eb' cha, xchi.

²⁴ Ach qui Diosal on̈, qui reyl ach on̈, caw 'oj a checlj 'el yuj smasnil eb' 'anma 'oj c'och secsnoc yic 'oj a c'och 'a a cajnub'.

²⁵ A eb' tzb'itni, a eb' b'ab'el. Ax eb' sonnum, a eb' tzac'an. Locn eb' 'ix cob'stac 'ix, xoj syucn eb' pandereta.

²⁶ E masnil ex yin̈tl Israel to yamn eyaj 'a tic, alc wach' paxti 'a Dios. Alc wach' paxti 'a Jehová.

²⁷ A 'a yojltac ata b'ab'l s'at eb' yin̈tl Benjamín, atn win tza'n 'unin. Til wal eb' syajlil yic Judá, eb' yic Zabulón, yet' eb' yic Neftalí, tza'n 'ochi.

²⁸ Ach qui Diosal on̈, 'icha wal otjnac a ch'oxn 'el a jelnal 'a yic pecti', 'ixta cab' tzotj a ch'oxn 'el 'ayn̈ ticnec on̈.

²⁹ A 'a atut chan̈ yajb't 'a Jerusalén, ata tzwul yac' eb' rey siylab' 'ayach.

³⁰ Tench wan jun b'uln̈ eb' 'anma 'et'jnac syamc'ab' yic owl tzcot 'a Egipto. Yujto lajn eb' 'icha jun tzo'n̈ no mam wacx caw ow, 'icha pax no quelmtac wacax. A jun tzo'n̈ chon̈b' cha, cojxn̈ej ricoal tznib'j eb', yujn̈ej snib'b'en eb' cha, tzya'n eb' owal. Sactzic cab' can 'at eb' 'anma tznib'j yac' owl cha.

³¹ 'Oj cot eb' 'aj Egipto wul yac' stojlb'al, ax eb' 'aj Etiopía caw 'oj smojq'ue eb' sc'ab' 'a 'aych ach qui Diosal on̈.

³² Ex to yajl eyaj 'a eb' lum chon̈b' 'a sat lum lum tic, b'itnejc b'it 'a Dios. B'itnan̈c 'a Cajlil,

³³ atn jun tzb'eyc' 'a satcha'an̈, jun to 'ayc' xon 'a pecti'. 'Ab'c wal schan̈il yol sjaj. A yol sjaj cha, man̈x jantcoc spoder.

³⁴ Tzcham wal eyojcan 'el sjelnal Dios, 'ayc' yip 'a yib'n̈ chon̈b' Israel, a sjelnal tzq'ue'ch 'a satcha'an̈.

³⁵ Caw satjub'tac yilx yaj Dios 'a yol scajnub'. A qui Diosalec an̈ israel on̈ec tic, tzyac' qui jelnalec yet' quip. ¡Alx cab' wach' paxti 'a qui Diosalec!