Salmos 67 - Chuj San Sebastian Bible

SALMO 67 Alj wach' paxti 'a Dios

A jun b'it tic tzc'anlb'ej junc mach tzjucb'tzan b'it yet' arpa.

¹ Ach Cajlil on̈, 'o'ch cab' a c'ojl 'ayn̈ on̈, 'a' cot a yaxilal 'a quib'n̈ on̈. Scha cab' a c'ojl on̈ eln coti,

² yic wach' a smasnil jun tzo'n̈ nacion̈ 'ay 'a sat lum lum tic, tzyojquej 'el eb' tas wal a nib'b'en, yet' pax colnb'il tzac'a.

³ Ach qui Diosal on̈, alx cab' wach' paxti 'aych yuj eb' chon̈ab'. Smasnil 'anma', yal cab' eb' wach' paxti 'ayach.

⁴ 'El cab' yaw eb' 'a tzaljc'ojlal, yujto ach tza b'eyc'ojlej eb' chon̈b' 'a stojlal; ach tza jucb'tzej eb' nacion̈ 'ay 'a yolyib'n̈q'uinl tic.

⁵ Ach qui Diosal on̈, alx cab' wach' paxti 'aych yuj eb' chon̈ab'. Smasnil 'anma', yal cab' eb' wach' paxti 'ayach.

⁶ A lum lu'um xyac' lum sb'a'al, xac' a yaxilal 'a quib'n̈ on̈, yujto qui Diosal ach on̈.

⁷ 'A'n̈j a yaxilal 'a quib'n̈ on̈, niwn cab' el'ch 'a smasnil yolyib'n̈q'uinl tic.