Salmos 66 - Chuj San Sebastian Bible

SALMO 66 Satjub'tac yilx smunljel Dios

A jun b'it tic tzc'an junc mach tzjucb'tzan b'it

¹ Qui masnil an̈ cajn on̈c 'a sat lum lum tic, b'itn coyc 'a Dios yet' qui tzaljc'ojlal.

² Qui b'itnoquec b'it yic tzqui'nec chan̈ sb'i, calc qui wach' paxti 'a 'a.

³ Calc 'a Dios 'ixtic: A wal a munljel Mamin, caw satjub'tac yilxi. Yuj wal a jelnal, caw tz'ib'x chan̈ eb' 'ajc'ojl 'a ojltac.

⁴ Smasnil 'anma 'a yolyib'n̈q'uinl tic, ya' cab' 'ejm sb'a eb' 'ayach, sb'itnoc cab' eb' b'it 'a a b'i, xqui chic 'a 'a.

⁵ Cotn̈ec, wul 'iltec smunljel Dios nab'an, atn jun tzo'n̈ satjub'tac yilx sb'o yuj qui wach'loc an̈ 'anman̈ec tic.

⁶ 'Ix meltzj 'och a mar 'a tacn̈ lumal yu'uj, axta 'ix 'ec' eb' qui mam quichmec yet' yoc 'a yojl a'. Ca'c tzaljoc qui c'ojl yet' qui Diosal.

⁷ Yet' wal sjelnal tzya'n Yajlil 'a smasnil tiempo; c'uxn tz'ec' sat 'a yib'n̈ eb' nacion̈, sec matz yij chan̈ sb'a eb' tu snab'en.

⁸ Smasnil niwc nacion̈ yal cab' wach' paxti 'a qui Diosalec. 'Ab'x cab' sq'ue yaw eb' sb'itni,

⁹ yujto a x'a'n qui q'uinlec, ma'ix snib'j to on̈ telwec 'ejmi.

¹⁰ Ach qui Diosal on̈, ach on̈ a'lj prowal, on̈ a sacb'tzej 'icha tz'aj sacb'tzax q'uen plata.

¹¹ On̈ ac' telwc 'a ch'an̈ ya'al, x'a'n qui cuch jun 'ictz caw 'al.

¹² On̈ ac' 'a yol sc'ab' eb' 'ajc'ojl yajch 'ayn̈ on̈, ax eb' laj on̈ te'wtan̈ni. On̈ laj 'ec' 'a scal a a', yet' 'a scal c'ac', palta ax 'a slajub', xa'n pax qui tzaljc'ojlal on̈.

¹³ 'Oj in c'och 'a atut, ax wa'n tz'a in xajmb'al 'a ojltac; 'ixta 'oj wutc wa'n 'el'choc tas 'aj 'ix wac' in ti 'ayach,

¹⁴ atn jun tzo'n̈ in ti wa'jnac 'ayach, yic 'ayn 'och 'a somc'ojlal.

¹⁵ A no noc' caw b'a'ch yajx servil, a no 'oj wac' tz'a 'a yib'n̈ yet'l a xajmb'al. 'Oj wac' no mam wacax, no mam chiwo yet' pax no calnelu caw wach' sjab' tzab'i.

¹⁶ E masnil ex to 'ay yel'ch Dios 'a e sat, cotn̈ec, 'oj wal eyab'i' tas wal tox 'ix sb'o 'ayin.

¹⁷ In 'awji, xin c'ann scolwal wet'oc, xwaln in wach' paxti 'a 'a.

¹⁸ Q'uinloc ma'ix in na in b'a yuj in mul, to 'ixta', ma'ix schaj sc'ojl am Cajlil yab'n tas xwala.

¹⁹ Palta 'in xyab' tas xwala, yuj cha, spactzan in lesal.

²⁰ ¡Alx cab' wach' paxti 'a Dios! Ma'ix spatquilj can 'el in lesal, ma'ix sb'asj pax schamc'ojlal 'ayin.