Salmos 65 - Chuj San Sebastian Bible

SALMO 65 Smoj wal yalx wach' paxti 'a Dios

Sb'it David jun tic tzc'an junc mach tzjucb'tzan b'it

¹ Ach qui Diosal on̈, smoj wal yalx wach' paxti 'aych 'a Sión, caw smoj ca'n 'el'choc tas ta'wb'il cuj 'aych on̈.

² Smasnil 'anma tzjaw 'ayach, yujto tzab'n̈j slesl eb'.

³ A wal qui maysch'olnilal on̈, a chi tzon̈ 'a'n telwc on̈, palta ach xo tzac' lajwc qui mul chi 'on̈.

⁴ Caw wach' quic an̈ sic'b'iln̈ 'el oj tic on̈, tzon̈ e'n 'at cajn 'a a tz'ey 'a atut. Caw 'oj qui b'ut'j yuj tas wach' sc'uxx 'ay 'a atut cha, atn tas caw ecn̈ej yaji.

⁵ Ach qui Diosal on̈, qui Colmal aji, ach tzon̈ a ta'wej, tzon̈ a b'onyaj yet' tas satjub'tac yilxi. Smasnil eb' 'anma cajn 'a sat lum lum tic, yet' eb' cajn 'a sc'axpil 'ec' a mar, 'oj ach ya'ch eb' yipc sc'ojol.

⁶ Yuj a poder caw tzatz 'ix otj can lum niwc witz 'a yet'ul.

⁷ Tza'n 'och wan yib'x sat a mar, tza'n pax 'och wan sb'uylji eb' niwc chon̈b' ya'n owal.

⁸ An̈jtona eb' cajn 'a snajtil sat lum lum tic, 'oj 'ib'xoc chan̈ eb' yiln tas satjub'tac yilx tza b'o'o. O'oj 'ay 'aw yic tzaljc'ojlal 'a stojlal 'aj tzq'uel c'u masnto 'a 'aj tz'em c'u.

⁹ Ach 'aych 'och eln sat lum lum tic, tza'n cot n̈ab' 'a yib'n̈ lu'um. Tza'n q'uib' tas 'ay 'a sat, yet' a a tz'el yoctac, atn a tz'a'n q'uib' 'ixm trigo. 'Ixta wal tzotj a b'on lum lum ach qui Diosal on̈.

¹⁰ Ach tzac' yaxb'oc sat lu'um, tza tojlb'tzan smasnil sch'olquixtacl sat. Tza'n c'unb'oc lum yuj yaxn̈ab', tza'n a yaxilal 'a yib'n̈ tas tz'el 'a sat lu'um.

¹¹ Til wal sat 'awb'en tzyac' 'a junjn ab'il o'oj, ax 'asun a tz'och n̈ab'il.

¹² Yuj cha, caw tzyaxb' sc'ultcal lum cusltac lu'um, ax lum tzalctac, caw wach' yilx tz'aj lu'um.

¹³ A 'a smasnil lum 'a'lic, ata tzb'ut'j 'ejm no calnelu; ax lum pan̈an, tzb'ut'j 'el lum yuj 'ixm trigo. Yuj cha, tzb'itn smasnil eb' 'anma 'ayach, tz'el pax yaw eb' yuj tzaljc'ojlal.