Salmos 64 - Chuj San Sebastian Bible

SALMO 64 Lesl yic tzc'anx scolwal Dios

Sb'it David jun tic tzc'an junc mach tzjucb'tzan b'it

¹ Ach in Diosal 'ab' wal tas tzwal 'ayach, c'ub'j in 'el 'a eb' 'ajc'ojl yajch 'ayin.

² C'ub'j in 'el 'a eb' maysch'olnil tas tzb'o'o, yet' 'a tas c'ultac tzna eb' 'a in patic. Coln 'el 'a eb', yujto cojxn̈ej tas tu tznib'j eb' sb'o'.

³ A yic tzyaln eb' paxti caw ya, caw lajn sti eb' chi 'icha junc cuchlub' caw jay ye, 'icha junc jul-lab' tzcham 'anma yu'uj.

⁴ C'ultacl tzb'o eb' junc tas 'a spatc eb' to may jac tas tztac' yu'uj, may xon jac xiwc'ojlal eb'.

⁵ Tzlaj ya'lac eb' ste'nal sb'on maysch'olnil. Tzlaj smol alnc eb' tas tzyutj eb' ya'n 'ejm sch'an̈ yal 'a c'ultaquil, tzyaln eb' 'ixtic: May mach tzon̈ 'ilnec, xchi cob' eb'.

⁶ Tzcham wal snan eb' tas tzyutj sb'on maysch'olnil, wach' tzyutj 'och eb' 'a yoclemal. A tas tzna eb' cha, c'ultac yaj 'a snab'en eb'.

⁷ A Dios 'oj 'a'nc lajwc eb' yet' sjul-lab', satc'ojlal wal yaj eb', ax slajw 'el eb'.

⁸ Mun a spaxti eb' chi 'oj 'a'nc telwoc; ax smasnil mach 'oj 'ilnc eb', 'oj b'uchxoc eb' yuj eb'.

⁹ 'Ixta to b'i'an, ax smasnil eb' 'anma', 'oj xiw chan̈ eb', 'oj yal-l eb' tas b'ob'il yuj Dios. Ax yojcan 'el eb' tas tz'el sb'on cha.

¹⁰ A eb' 'anma wach' sb'eyb'al, 'oj yac' eb' tzaljoc sc'ojl 'a Jehová, ax sayn 'ec' eb' colwal 'a 'a. A smasnil eb' wach' snab'en, 'oj can eb' 'a tzaljc'ojlal.