Salmos 63 - Chuj San Sebastian Bible

SALMO 63 A Dios tz'a'n stzaljc'ojlal 'anma'

Sb'it David jun tic yic 'ayc' 'a cusltac lum 'a yol yic Judá.

¹ Ach in Diosal, tzin nib'j tzwal in b'a 'aych 'a caw sq'uin̈b'ilto. Caw tzach in nib'j 'icha tzyac' lum tacn̈ lu'um yic tznib'n lum n̈ab'.

² Tzin nib'j tzach wil 'a a cajnub', 'oj cham wal in c'ojl wiln a poder yet' a tzictznial.

³ Yujto a 'a chamc'ojlal, yel xo wal niwn yel'ch 'a yib'n̈ in q'uinal. Yuj cha, 'oj ach in b'itnoc.

⁴ Smasnil tiempo yic pitzn in, 'oj wal wach' paxti 'ayach, 'oj in moj q'ue in c'ab' 'ayach, yic 'oj in leslwi.

⁵ Caw 'oj b'o in c'ojl 'icha junc mach tzyac' sgana sc'uxn junc tas caw wach'. Yet' wal in tzaljc'ojlal ax waln wach' paxti 'ayach.

⁶ A 'a yic 'ac'wal, yic c'otninx 'eq'ui, tzach in nan coti, tzach 'ec' 'a in c'ojol.

⁷ In a colo yujto 'ayn 'ec' 'a yaln̈ a poder, yuj cha, caw tzin tzalj 'a en̈l 'icha tzyac' no cotc caxtiln̈ 'a yaln̈ sc'axl snun.

⁸ Caw wal junn̈j waj et'oc, quetzb'iln oj yet' a wach' c'ab'.

⁹ Ax eb' tzin nib'n milnc chamoc, 'oj 'atcn eb' 'a yol sjul-l eb' chamnc 'anma';

¹⁰ 'oj milxc cham eb' yet' q'uen espada caw jay ye, ax no 'ocs 'oj chinc eb'.

¹¹ Palta an xo an reyn tic, 'oj wac' tzaljoc in c'ojl 'ayach. 'Oj b'itnc smasnil eb' tzb'inan a b'i 'a 'aj tzyac' eb' sti'. Ax eb' 'a'm 'es, sictac 'oj 'aj eb'.