Salmos 62 - Chuj San Sebastian Bible

SALMO 62 Cojn 'a Dios 'aj tzqui colc qui b'a

Sb'it David jun tic tzc'an Jedutún win tzjucb'tzan b'it

¹ Cojn 'a Dios 'aj tz'ilchj junc'ojlal wu'uj, a 'a tzcot in colnb'il.

² Cojn tztac' in scolni, a 'aych pax wen̈loc. Ma'oj wejm yuj eb' 'ajc'ojl cha, yujto a 'a tzin col in b'a.

³ ¿B'a'n̈ 'oj eyactc eya'n owl wet'oc? Tze nib'j wal tzin telw 'ejmi. Lajn xoj in 'icha yich n̈a wan yem lan̈joc e nani, mto 'icha pax junc col-l wan slan̈chji.

⁴ Cojn wal tas tz'aj sat 'ejm in b'inab'ilal, an̈j chi tze na'b'tan̈ej. Cojxn̈ej wal 'a'j 'es tze chamc'ojlej. Tzeyal cob' wach' paxti 'ayin, palta ax yet' e nab'en to tzin e catb'ej cani.

⁵ Cojn 'a Dios 'aj tz'ilchj junc'ojlal wu'uj, cojn yipc'ojlal yaj wu'uj.

⁶ A tztac' in scolni, a 'aych pax wen̈loc. Ma'oj wejm yuj eb' 'ajc'ojl cha, yujto a 'a tzin col in b'a.

⁷ A 'a Dios tzcot in colnb'il, yuj cha 'ay wel'chi; a 'aych wen̈loc, ata tzin col in b'a.

⁸ Ex wit chon̈ab', ca'c 'och Dios yipc qui c'ojl 'a smasnil tiempo. Yet' wal smasnil qui c'ojlec, tzon̈ leslwiec 'a 'a, yujto cojn 'a 'aj wach' tzqui colc qui b'a.

⁹ Caw matz tac' ca'nec 'och eb' quit 'anmal yipc qui c'ojol, wach'xam meb'a eb' mto rico eb'. Lajn eb' 'icha junc tas man̈ alc xon jab'oc tz'ejm 'a yojl junc libra, wach'xam junxn̈ej tzcutjec quechtan eb' smasnil, toxn matz 'ejm xon jun libra chi yuj eb'.

¹⁰ A mach tzyac' ganar tumn 'a spatc maysch'olnil mto yuj 'elc'al, caw matz tac' ya'n 'och jun chi yipc sc'ojol. Toto tzq'ue'ch yet' tas 'ay 'a 'a, matz tac' ya'n 'och sricoal chi yipc sc'ojol.

^11-12 Til wal 'ejm 'ix wab' yaln Dios jun tzo'n̈ tic, chajtlto caw 'ay sjelnal, 'ay pax schamc'ojlal. A tz'a'n spac yic junjn 'anma', a tzyala tas tz'el sb'oni.