Salmos 61 - Chuj San Sebastian Bible

SALMO 61 Tzwa'ch scolwal Dios yipc in c'ojol

Sb'it David jun tic tzc'anlb'ej junc mach tzjucb'tzan b'it yet' arpa.

¹ Ach in Diosal 'ab' wal tas tzwala, yujto tz'el waw yuj in yailal; pactzej in lesal.

² 'Ayn 'ec' 'a 'aj tzlajw wul sti lum lum tic yic tzin 'awj 'ayach, yujto caw tz'el yip in pixn tzwab'i. 'Ij in 'at 'a 'aj 'ay junc niwquil q'ue'en, 'a'n can q'ue 'a yib'an̈, sec tzin colchji.

³ Yujto a 'aych tzin col in b'a. Lajn ach yet' junc cuartel caw 'ay yip. Ach tzin a col 'a eb' 'ajc'ojl yajch 'ayin.

⁴ Tzin nib'j tzin 'aj cajn 'a atut 'a smasnil tiempo. Tzin col in b'a 'aych 'icha tzyutj scoln sb'a no yune caxtiln̈ 'a yaln̈ sc'axl snun.

⁵ 'Ix ab' tas 'ajtil 'ix wac' in ti 'ayach, 'ix ac' in macl 'a scal eb' to 'ay el'ch 'a sat.

⁶ Ach in Diosal, 'ac' najtxb'oc in q'uinl an reyn tic, caw niwn cab' sb'isl yab'lil tzwila.

⁷ Wa' cab' yajlil 'a ojltac yuj a wach'c'ojlal. Tan̈wj in yet' a chamc'ojlal, yujto tz'el'chn̈ej tas tzala.

⁸ 'Ixta 'oj wutc in b'itnan a b'i 'a smasnil tiempo. 'A junjn c'u ax in yiclni tas 'aj 'ix wac' in ti 'ayach.