Salmos 6 - Chuj San Sebastian Bible

SALMO 6 Lesl yic niwc somc'ojlal

Sb'it David jun tic tzc'an eb' tzjucb'tzan b'it yet' arpa

¹ Mamin Jehová man̈ in a tumc yet' yowl a c'ojol, man̈ a'ch in yailal yet' yowl a c'ojol.

² 'O'ch cab' wal a c'ojl 'ayin, yujto man̈x 'a wip tzwab'i. 'Ac' jawc in c'ojl Mamin. Smasnil in niwnal, caw tz'el yip tzwab'i.

³ Caw 'ayn 'och 'a somc'ojlal. Ach xo Mamin, ¿b'a'n̈ tzwul in a colo'?

⁴ Coln Mamin Jehová, coln yet' a chamc'ojlal.

⁵ A eb' chamnc xo, matz tac' ach snan cot eb'. ¿Tom 'oj stac' ach sb'itnan cot eb'?

⁶ Caw wal tz'el'ch wip woq'ui. Til wal woc' 'a junjn 'ac'wal, caw tzlojx 'el in c'an̈jolm yuj yal in sat.

⁷ Smulyujoc eb' 'ajc'ojl yajch 'ayin, xmal yol in sat woq'ui, man̈xtzac stac' wilni.

⁸ 'Eln̈ec 'a in tz'ey ex tze b'o maysch'olnil, tox 'ix yab' Jehová woq'ui.

⁹ Tox 'ix yab' in tew 'a 'a, 'ix schaj yab' in lesal.

¹⁰ A eb' 'ajc'ojl yajch 'ayin, caw 'oj q'uixwc can 'el eb' yuj xiwlal. 'A jun mutz' satil ax s'atcn eb' 'elc 'a scal q'uixwc'ojlal.