Salmos 59 - Chuj San Sebastian Bible

SALMO 59 A Jehová a tzin colni

Sb'it David jun tic yic 'ix ya'n 'at Saúl eb' soldado 'at stan̈wc yatut David yic tzmilxi. A jun b'it tic tzc'anlb'ej junc mach tzjucb'tzan b'it.

¹ Ach in Diosal, coln 'el 'a eb' 'ajc'ojl yajch 'ayin, yet' 'a eb' tzcomn chichn 'och 'ayin.

² Coln 'el 'a eb' tzb'on maysch'olnil yet' 'a eb' milm cham 'anma'.

³ Mamin Jehová 'ay eb' 'anma caw jelan, tzlaj in smac eb' 'aj tzin 'eq'ui yic tzin smiln cham eb' snani. Palta may in mul 'a eb', may tas tu tzin b'o'o.

⁴ Caw may cob' in mul, palta tzsay eb' tas tzyutj ya'n owl wet'oc. 'Ilt in coti, colwjan̈ wet'oc.

⁵ Mamin Jehová, tzta'n̈j oj smasnil, qui Diosal ach an̈ israel on̈ tic on̈. Cotan̈, 'a'ch syailal eb' chon̈b' tic; man̈ 'o'ch a c'ojl 'a smasnil eb' tzmeltzj 'och 'ayn yet' smaysch'olnilal.

^6-7 A yic tzq'uic'b'i tzjab'x can eb', tz'el yaw eb' 'icha no tz'i tz'el swom sti'. Tz'ec' yoymtanc eb' chon̈ab'. Tzlaj yalnc eb' ya paxti', tzyaln eb' 'ixtic: May mach tz'ab'n tas tzcalec, xchi cob' eb'.

⁸ Palta ach xo Mamin Jehová, ton̈j 'oj a tzewj yuj eb'; ton̈j 'oj a b'uchwj 'a smasnil eb' chuc chon̈b'al cha.

⁹ Ach in Diosal, an̈j 'aych tzin col in b'a, yujto ach 'aych 'och wipoc. Ach tzin a col 'a eb' 'ajc'ojl yajch 'ayin.

¹⁰ Tzin a chamc'ojlej, ach 'oj a b'ab'lj wu'uj, ax a'n wila', tas 'oj 'aj slajw 'el eb' 'ajc'ojl yajch 'ayin.

¹¹ Man̈ a mil cham eb', sec wach' ma'oj 'at satc'ojlal syailal eb' yuj eb' wit chon̈ab'. Mamin, pechcn 'at eb' yet' a poder, 'a'cn 'och eb' 'a 'emmquilal, in Colmal ton aji.

¹² Tz'och smul eb' yuj smasnil tas tzyala; 'och cab' syailal eb' yuj sb'an̈quinal, yuj scatb' paxti', yet' pax yuj ya'm 'esal eb'.

¹³ Satcn 'el eb' yet' yowl a c'ojol, sat cab' 'el eb' sec man̈x 'aj 'oj checljoc chan̈ eb'. 'Ac' yojcoc 'el eb' chajtlto ach tic Dios ach, yajl aj 'a quib'n̈ an̈ yin̈tl on̈ Jacob tic on̈, yet' 'a 'aj tzlajw c'och yolyib'n̈q'uinl tic.

¹⁴ A yic tzq'uic'b'i tzjapx can eb', tz'el yaw eb' 'icha no tz'i', tzyoymtan eb' chon̈ab'.

¹⁵ Caw matz 'och wan xon eb' sb'eyq'ui tz'ec' 'ac'wal, yic tzsayn 'ec' eb' tas tzc'uxu, tz'el yaw eb' 'icha 'oques, yujto matz c'och sc'ojl eb'.

¹⁶ Palta an xo pax tic Mamin, 'oj ach in b'itnoc 'a caw sq'uin̈b'ilto. 'Oj walcn 'el a chamc'ojlal yet' in b'it, yuj pax smasnil tas tztac' o'oj. Yujto a 'aych tzin col in b'a 'a yic stiempoal 'ay in yailal, 'icha to wen̈l aji.

¹⁷ Ach in Diosal 'oj in b'itn 'ayach, yujto in Colmal aji, tzin a chamc'ojlan paxi.