Salmos 58 - Chuj San Sebastian Bible

SALMO 58 B'eyc'ojlal 'a eb' maysch'olnil

A jun tic sb'it David tzc'anlb'ej junc mach tzjucb'tzan b'it

¹ Ex yajal, ¿yel am wali tojl tzeyutj e b'eyc'ojlwi, tojl am wal tzeyutj eya'n 'och syailal eb' 'anma'?

² Ocxo jun, tze b'oyaj eb' yet' e tu nab'enal. 'I'm ex b'ey maysch'olnil 'a yol chon̈ab'.

³ A eb' tzb'on maysch'olnil, 'ayt 'ec' eb' 'a yol sc'ojl snun, tzcuyn eb' tu nab'enal. A eb' 'a'm 'es, cojn tz'alj eb', tzcuyn sb'a eb' ya'n 'es cha.

⁴ Lajn eb' yet' no chan 'ay svenenoal. Lajn eb' 'icha no niwc chan matz maclni yab'i'.

⁵ Matz yab' no tas tzyal eb' tz'utz'n no', atn eb' jeln smontn no'.

⁶ Mamin Jehová, in Diosal ach, 'ij 'el yip eb' 'icha tzyutj eb' 'anma sma'n 'el ye no león.

⁷ Sat cab' 'ejm eb' 'icha tz'aj stup 'ejm a a tzb'eyi. Lajn cab' tz'aj eb' 'icha te c'ultc tzte'x yuj 'anma'.

⁸ 'Ulb'x cab' 'ejm eb' 'icha tzyac' no xoch 'a yol sjoxil, 'icha junc 'e'lti 'unin, mto 'icha junc 'unn chamnc xo tz'alji, matz yil xon jac sacq'uinal, 'ixta cab' tz'aj eb'.

⁹ Lajw cab' 'ejm eb' mu'c 'icha te q'uix tzmolb'tzax 'och 'a yaln̈ chen, yajn̈ej tz'a 'ejmi. Toxn matz xej xon jun chen chi yu'uj.

¹⁰ Ax eb' tojl sb'eyb'al, 'oj tzaljoc eb' yic 'oj 'ajxoc spac 'a eb' maysch'olnil sb'eyb'al, yic 'oj sb'on̈nc eb' yoc 'a schic'l eb' maysch'olnil cha.

¹¹ 'Ixta to b'i'an ax yalx 'ixtic: Caw wal wach' yic eb' te'n xyutj sb'a sb'on tojlal. Caw yel 'ay jun Dios tzb'eyc'ojlan yolyib'n̈q'uinl tic, 'oj schioc.