Salmos 57 - Chuj San Sebastian Bible

SALMO 57 Lesl yic tzc'anx scolwal Dios

Sb'it David jun tic yic 'ix 'at 'elc 'a Saúl, 'ix 'at tzc'ub'c 'el sb'a 'a yol q'uen n̈aq'ue'en. A jun b'it tic tzc'anlb'ej junc mach tzjucb'tzan b'it.

¹ Ach in Diosal, 'o'ch cab' a c'ojl 'ayin. A 'aych tzin col in b'a masnto tz'ec' jun yailal tic 'a wib'an̈. Tzin nib'j tzin col in b'a 'aych 'icha tzyutj scoln sb'a no yune caxtiln̈ 'a yaln̈ sc'axl snun.

² Ach in Diosal caw niwn el'chi, 'oj wal in b'a 'ayach, colwjan̈ wet' 'a smasnil tas.

³ A yuj a chamc'ojlal yet' yuj tz'el'chn̈ej tas tzala, yuj cha, tza' cot colnb'il 'ayn 'a satcha'an̈, ax in a coln 'el 'a yol sc'ab' eb' tzin 'ixtni.

⁴ Oyn 'och eb' 'ajc'ojl 'ayn 'icha no león tzchin eb' 'anma'. Lajn wal ye eb' 'icha q'uen lanza, lajn pax yet' jun tzo'n̈ jul-lab'; a spaxti eb', lajn yet' q'uen espada caw jay ye.

⁵ Ach in Diosal, 'ijx cab' chan̈ a b'i 'a yib'n̈ satcha'an̈, ch'oxx cab' a tzictznil 'a smasnil yolyib'n̈q'uinl tic.

⁶ A eb' 'ajc'ojl yajch 'ayin, xyac' 'ejm eb' ch'an̈ yal 'a wojltac, caw tztac in c'ojl yuj eb'. 'Ix sjoyn eb' jun jul 'a wojltac, palta mun a eb' xtelw can 'at 'a yojol.

⁷ Ach in Diosal, caw tzchaj in c'ojl ach in b'itnani, caw tzin nib'j tzach in b'itnej.

⁸ A yic 'oj sacb'c 'el 'a junx c'u, ax yel in wayan̈, 'oj ach in b'itnoc yet' arpa yet' pax salterio.

⁹ Mamin, 'oj ach in b'itnoc 'a scal eb' chon̈ab', yet' 'a scal eb' niwc nacion̈.

¹⁰ Yujto a 'a chamc'ojlal, caw tzc'och 'a satcha'an̈; ax a tojlal man̈x 'a slajub'.

¹¹ Ach in Diosal, 'ijx cab' chan̈ a b'i 'a yib'n̈ satcha'an̈, ch'oxx cab' a tzictznil 'a smasnil yolyib'n̈q'uinl tic.