Salmos 56 - Chuj San Sebastian Bible

SALMO 56 A Dios tzwa'ch yipc in c'ojol

Sb'it David jun tic yic 'ix yamchj yuj eb' filisteo 'a chon̈b' Gat. A jun b'it tic tzc'anlb'ej junc mach tzjucb'tzan b'it.

¹ Ach in Diosal 'o'ch cab' a c'ojl 'ayin, yujto 'ay eb' 'anma tzin pechn b'eyc'oc. Junjn c'u tzya'n eb' owl wet'oc, tzin yixtn eb'.

² 'A junjn c'u tzin spechn b'eyc'oc eb' 'ajc'ojl yajch 'ayn cha, caw niwn eb' tzyij chan̈ sb'a ya'n owl wet'oc.

³ A yic 'ay in xiwc'ojlal, caw tzach wa'ch yipc in c'ojol.

⁴ Mamin, caw tzach wa'ch yipc in c'ojol, tzwaln wach' paxti 'a tas aljnac, yuj cha, matz in xiwi. ¿Toc 'ayt wal 'oj in yutc eb' 'anma to chaml b'a yaji?

⁵ Smasnil tiempo tzyal eb' ya paxti 'ayin, tznib'n eb' tzin juw 'eli, an̈j chi nan yuj eb'.

⁶ Tzan 'ajtil tzyam sb'a eb', tzlaj sc'ub'nc 'el sb'a eb' yic tzin smacn eb', tzin stan̈wni eb', ax yec' a janic' tzin smiln eb' snani.

⁷ ¿Tom 'oj stac' s'at eb' 'elc yuj smul cha? Ach in Diosal, 'ij 'ejm eb' 'anma tic yet' yowl a c'ojol.

⁸ B'isb'il o'oj jay 'ejm tzin 'elq'ui, ojtac jantc wal tzin 'aj woq'ui. Tz'ib'b'il jun tzo'n̈ tic oj 'a a libro.

⁹ A eb' 'ajc'ojl yajch 'ayin, 'oj 'at eb' 'eloc yic 'oj in c'annc a colwal. Caw wojc si'mb'il to Dios ach, 'aych 'och wet'oc.

¹⁰ Mamin Jehová, in Diosal ach, caw tzach wa'ch yipc in c'ojol, tzwaln wach' paxti 'a tas aljnac.

¹¹ Tzach wa'ch yipc in c'ojol, yuj cha, caw matz in xiwi. ¿Toc 'ayt wal 'oj in yutc eb' 'anma'?

¹² Ach in Diosal, 'oj in yiclc jun tzo'n̈ in ti 'ix wac' 'ayach, atn jun xajmb'al yic tzwaln yuj diosal 'ayach,

¹³ yujto in a col 'a yol sc'ab' chamel, sec matz in 'em yuj eb' 'ajc'ojol. Axn̈ej 'a a sacq'uinlal tzin 'eq'ui, tza'n in q'uinal yic tzin b'eyc' jacx 'a ojltac.