Salmos 55 - Chuj San Sebastian Bible

SALMO 55 A slesl jun 'anma tzpechx b'eyc'oc

Sb'it David jun tic tzc'anlb'ej junc mach tzjucb'tzan b'it yet' arpa.

¹ Ach in Diosal, maclj ab' in lesal; man̈ ton̈joc tza chaj 'ec' tas tzwala.

² 'Ochn̈ q'ueln 'ayin, tza'n spac tas tzin c'an 'ayach, a 'a scal in yailal wan waln in b'a 'ayach.

³ Caw tzin 'ib'x chan̈ yuj sjaj eb' 'ajc'ojl yajch 'ayin, tz'el yaw eb' yet' smaysch'olnilal. 'Ix ya'ch eb' yailal 'a wib'an̈. Tzin spechn b'eyc'oc eb' yet' yowl sc'ojol.

⁴ Caw tzyab' in pixn syal yuj eb'; 'ix jaw smay chaml 'a wib'an̈.

⁵ 'Ix jaw jun niwquil xiwc'ojlal 'ayin, caw tzin 'ib'x chan̈ yuj xiwlal.

⁶ Tzwaln 'ixtic: Comnoc wal 'ay in c'axl 'icha no parama, to 'ixta', tzin 'at jen̈n̈oc wal jab'oc yic tzin 'ilji.

⁷ Tzin 'at jen̈n̈oc 'elc 'a caw najat; ax 'a cusltac lum tzin can cajan.

⁸ Caw ji'lti tzin 'at in col in b'a yuj jun 'icha owl yaxn̈ab' 'aych yic'al, xin chi.

⁹ Mamin, satcn 'el eb' 'ajc'ojl cha, 'ac' somchjoc 'el eb', yujto may sniwnc'ojlal eb'. Cojxn̈ej owl tzwil sb'on eb' 'a yol chon̈ab'.

¹⁰ Sc'ual yac'wlil yec' eb' yoymtoc chon̈ab'. Cojxn̈ej maysch'olnil yet' najchan̈ comn paxti 'ay 'a yol chon̈ab'.

¹¹ Cojxn̈ej maysch'olnil, 'elc'al yet' 'es 'ay 'a yoltc caye.

¹² Toto a junc comn 'ajc'ojl tzin 'ixtni, to 'ixta' tztechj am wu'uj, toto a mach tzchichn 'och 'ayin, a 'ixta tzin 'utni, tztac' in c'ub'n 'el in b'a 'a 'a.

¹³ Ocxo jun, a jun 'ixta tzin 'utn cha, caw wu'lem si'mb'il, in wach'c'ojl in b'a yet'oc.

¹⁴ Moln in 'at yet' 'a yatut Dios, tzin mol paxtin yet'oc, caw in wach'c'ojl in b'a yet'oc.

¹⁵ Jaw cab' chaml 'a yib'n̈ eb' 'ajc'ojl yajch 'ayin. Pitznto cab' eb' tz'ejm can eb' 'a yol sjul-l eb' chamnac, yujto cojxn maysch'olnil 'ayc' 'a scal eb' 'a yol yatut.

¹⁶ Palta an xo tic, cojn 'a Jehová Dios tzwal in b'a, a tzin colni.

¹⁷ 'A sq'uin̈b'ial, 'a chimc'ual, yet' 'a yemc'ual, 'oj wal in b'a 'a 'a, ax yab'n tas 'oj wala'.

¹⁸ 'Oj in scolcn 'el 'a scal owal; wach'xam caw niwn eb' 'ajc'ojl yajch 'ayin.

¹⁹ A Dios Yajl 'a jun 'ejmn̈ej, 'oj yab' tas 'oj wala', ax 'oj 'i'nc 'ejm eb' 'ajc'ojl cha, yujto matz jel eb' sb'eyb'al, matz xiw pax eb' 'a Dios.

²⁰ A jun wu'lem cha, tzyij chan̈ sc'ab' 'a eb' swach'c'ojol; matz yiclj 'aj tzyac' sti yoch 'a junc'ojlal.

²¹ Caw tzc'unni spaxtini, palta ax 'a snab'en, cojxn owl tznib'ej. 'Icha wal aceite tz'och 'a junc lajwel, 'ixta slab'b'il spaxtini. Ticni man̈ yeloc, lajn wal spaxti chi 'icha q'uen espada caw jay ye.

²² 'A'ch smasnil a somc'ojlal 'a yol sc'ab' Jehová, ax 'oj 'a'nc a te'nal. A mach yiclum 'a 'a, may xon b'a'n̈ 'oj chaxc telwc yu'uj.

²³ Ach in Diosal, a eb' milm cham 'anma', yet' eb' 'a'm 'es, caw may sq'uinl eb', ma'oj nan̈lb'oc sq'uinl eb' yilni. Ach 'oj a'cn 'ejm eb' 'a yich sjul-l eb' chamnac, palta an xo tic, ach tzach wa'ch yipc in c'ojol.