Salmos 53 - Chuj San Sebastian Bible

SALMO 53 A smaysch'olnilal eb' 'anma'

Sb'it David jun tic tzc'an junc mach tzjucb'tzan b'it

¹ A eb' tu sb'eyb'al, may Dios snan eb'. 'Ix juw 'el snab'en eb' smasnil, til wal tas yajb'entac xlaj sb'o eb', man̈x 'a junc mach tzb'on tas wach'.

² A 'a satcha'an̈, ata q'ueln 'emt Dios 'a 'ayn̈ec an̈ 'anman̈ec tic, yic tzyilni toto 'ay junc on̈ 'aych qui nab'en 'a 'a, toto nan to cu'uj.

³ Palta c'uxn on̈ juwc 'el qui masnil. Jun lajnn̈ej on̈ juwc 'eli, toc 'ayt junc on̈ tzqui b'o tas wach', man̈x 'a xon wal junoc.

⁴ Caw may snab'en eb' tzb'on maysch'olnil, atn eb' tzsatn 'el eb' wit chon̈ab'. 'Icha tz'aj junc tas tzc'uxxi, 'ixta tz'aj eb' yuj eb', matz yal pax sb'a eb' 'a Dios.

⁵ Wach'xam may tas tzxib'tn eb', palta caw 'oj 'ib'xoc chan̈ eb' yuj xiwlal. Yujto a Dios 'oj 'a'n sactzic sb'acl eb' 'ajc'ojl cha. 'Oj cancn eb' 'a q'uixwc'ojlal, ax spatquilx can 'el eb' yu'uj.

⁶ A cab' wal 'a tzaln Sión tzcot qui colnb'il an̈ israel on̈c tic. A yic 'oj ya'nc pax Jehová swach'c'ojlal 'a quib'n̈ec jun 'ejm xo, caw 'oj qui tzaljec an̈ yin̈tl on̈c can Jacob tic.