Salmos 52 - Chuj San Sebastian Bible

SALMO 52 A eb' tzb'on maysch'olnil

A jun tic sb'it David yic xjaw win Doeg 'aj Edom, 'ix yal yab' Saúl to 'ix 'ec' David 'a yatut win Abimelec. A jun b'it tic tzc'anlb'ej junc mach tzjucb'tzan b'it.

¹ Ach to jeln a'n owal, ¿tas yuj tzej chan̈ a b'a 'a maysch'olnil? A schamc'ojlal Dios 'ayc'n̈ej 'a jun 'ejmn̈ej.

² Cojn maysch'olnil tza nib'j a b'o'. A 'a ti', lajn wal 'icha junc cuchlub' caw jay ye, yujto cojn 'es tzala.

³ Yel xo wal tza chamc'ojlej maysch'olnil 'a yib'n̈ tas wach'. Caw 'a'm ach 'es, may jac tas yel tzala.

⁴ Ach 'a'm 'es, a wal paxti ya tz'och 'a junc 'anma', a tza nib'j ala';

⁵ palta a Dios 'oj a satn 'el 'a jun 'ejmn̈ej. 'Oj ach yic' 'elt 'a yol atut, ax yi'n 'ec' a q'uinal.

⁶ A yic 'oj yilnc eb' yiclum 'a Dios jun tic, caw 'oj xiw eb' yu'uj. 'Oj stzetzc eb' jun 'anma cha, ax yaln eb' 'ixtic:

⁷ 'Iltec wal jun 'anma to man̈oc Dios tzya'ch yipc sc'ojol; cojn wal sricoal tzya'ch yipc sc'ojol, cojxn maysch'olnil tzb'o'o, 'oj schic eb'.

⁸ Palta an xo tic, lajn in 'icha junc te olivo caw ya'ax, wach' sq'uib' 'a yamq'uil yatut Dios. 'Oj wa'chn̈ej schamc'ojlal Dios yipc in c'ojl 'a smasnil tiempo.

⁹ Ach in Diosal, caw wach' tas xa b'o 'ayin. Sat wal eb' ecxo yaji ax waln in wach' paxti 'ayach. 'A smasnil tiempo 'oj ach wa'ch yipc in c'ojol.