Salmos 51 - Chuj San Sebastian Bible

SALMO 51 Ach in Diosal 'o'ch cab' a c'ojl 'ayin

Sb'it David jun tic yic xtumx yuj Natán win schecb' Dios, yujto xyij 'ec' win 'ix Betsabé yistzil Urías. A jun b'it tic tzc'anlb'ej junc mach tzjucb'tzan b'it.

¹ Caw 'ay a chamc'ojlal ach in Diosal, 'o'ch cab' wal a c'ojl 'ayin, suc sat in paltail.

² B'icl in maysch'olnilal, sacb'tzej in 'a scal in mul,

³ yujto 'ix wojquej 'eli, to x'och in paltail. A jun in mul cha, caw matz sat 'a in c'ojol.

⁴ Caw 'ix 'och wal in mul 'ayach, 'ix in b'o tas tu 'a a sat. Yuj cha, smoj wal in a b'eyc'ojlani, matz tac' yalx tu paxti 'aych yuj jun a b'eyc'ojlal cha.

⁵ Wal yel a yic in 'alji, toxnto may in ch'olnil. Yictax 'aynto 'ec' 'a yol sc'ojl in nun, man̈ in wach'oc.

⁶ Caw 'ay a chamc'ojlal 'a eb' to a yet' smasnil sc'ojol tzb'on stojlal, yuj cha, 'ac' wal a jelnal 'ayin.

⁷ 'Ijcan 'el in mul, sec tzin b'ox can 'el'chi. B'icn can 'eli, sec yel xo sac tzin 'ajcn 'icha q'uen sacb'acum.

⁸ 'Ac' tzaljoc in c'ojol, 'ac' jawc in tzaljc'ojlal jun 'ejm xo, wach'xam tox in a b'eyc'ojlej si'mb'il.

⁹ Najt tzejcan 'el in mul 'a ojltac, suc sat smasnil in maysch'olnilal.

¹⁰ Ach in Diosal, a wal junc nab'en caw wach' a tzac' 'ayin. Tza'n 'a'tb'oc wespíritu sec yiclum in 'ayach.

¹¹ Man̈ in e'cn 'el 'a ojltac, man̈ e'l wal Espíritu to ecn̈ej yaj 'aych 'ayin.

¹² 'Ac' in colnb'il, 'ac' jawc in tzaljc'ojlal jun 'ejm xo; 'ac' in b'eylb'oc yiclumal 'a smasnil in c'ojol.

¹³ Yic wach' a eb' tz'ec' 'a yib'an̈, 'oj in cuy eb' 'a a b'eyb'al, ax eb' tzb'on maysch'olnil, 'oj meltzjoc pax 'och eb' wuj 'a yol a c'ab'.

¹⁴ Ach in Diosal milm in ton cham 'anma', palta coln 'el 'a yol sc'ab' jun tic. Caw 'ac' in colnb'il, sec 'oj wal-l a tojlal yet' in b'it.

¹⁵ Mamin Jehová jac wal in ti', sec 'oj ach in b'itnoc yet' in wach' paxti'.

¹⁶ Yujto ach tic, matz a nib'j ofrenda yet' no xajmb'al. Q'uinloc tzyal a c'ojol, to 'ixta', tzwac'a; ocxo jun matz tzchaj a c'ojl jun tzo'n̈ cha.

¹⁷ A jun xajmb'al tza nib'j ach in Diosal, atn yic tzqui nan qui b'a yuj qui mul. Caw matz on̈ a patquilj can 'el an̈ tzquij 'ejm qui b'a 'a yic tzqui nan qui b'a cha.

¹⁸ 'Ac' a wach'c'ojlal 'a yib'n̈ Sión, yuj swach'l a nab'en, tza b'on chan̈ smuroal Jerusalén jun 'ejm xo.

¹⁹ 'Ixta to am b'i'an ax schan a c'ojl jun tzo'n̈ xajmb'al cha, ofrenda yet' jun tzo'n̈ no xajmb'al tz'ajx tz'a smasnil. Ax yajx am no quelm wacx xajmb'al-l 'a yib'n̈ yet'ul.