Salmos 50 - Chuj San Sebastian Bible

SALMO 50 A Dios atn Juez tojol

Sb'it win Asaf jun tic

¹ A Dios Cojxni, atn Jehová, a xpaxtini yic xyawtn eb' 'anma cajn 'a sat lum lum tic; eb' 'ay 'a stojlal 'aj tzq'uel c'u, yet' eb' 'ay 'a stojlal 'aj tz'em c'u.

² A Dios tzch'ox stzictznil 'a tzaln Sión, jun chon̈b' caw wal wach' yilxi.

³ 'Oj jawc qui Diosalec, palta man̈toc sictac 'oj 'aj sjawi. 'Ay jun c'ac' b'ab'l sjaw yu'uj, a jun chi tzsatn 'el smasnil tas. Oyn 'och pax jun niwquil 'ic' 'a 'a.

⁴ A 'a cha'an̈, ata tzyawtj Dios eb' 'aj satcha'an̈ yet' eb' 'aj sat lu'um, sec tzyil eb' sb'eyc'ojlax schon̈b' Dios.

⁵ Tzyaln 'ixtic: Molb'tzej cot eb' to wicxo yaji, eb' xya' yofrenda 'ayin yic sb'on eb' jun strato wet'oc, xchi.

⁶ Ax satcha'an̈ a 'oj ch'oxnoc 'eli, to a Dios atn Juez, caw tojl tzyutj sb'eyc'ojlwi.

⁷ Tzyaln pax 'ixtic: Ex israel in chon̈b' eyaji, macljec eyab' tas 'oj wala', tojln̈ej 'oj wutc waln 'och 'a e sat. An ton tic Dios in, caw e Diosal in.

⁸ Ma'oj ex in tumc yuj e xajmb'al tzeya'n̈j 'ayin, yet' pax jun tzo'n̈ xajmb'al tzeyac' tz'a 'a wojltac.

⁹ A no quelm wacax yet' no mam chiwo cajb'il eyu'uj, may tz'och no wu'uj.

¹⁰ Smasnil no calte'al noc', yet' e no cajb'il noc' 'ay 'a jolmctac witz, wic e no'.

¹¹ Wic smasnil e no ch'ic 'ay 'a calte', yet' pax tas tzlaj 'ib'x 'a waymtac, wic smasnil.

¹² Q'uinloc 'ay in wejel, ma'oj wal eyab'i', yujto wic smasnil tas 'ay 'a yolyib'n̈q'uinl tic.

¹³ ¿Tom a schib'jal no mam wacx tzin chi'a, mto a schic'l no mam chiwo tzwuq'uej?

¹⁴ A 'e xajmb'al tzin nib'ej, atn alj wach' paxti 'ayin. 'A'c 'el'choc e ti tzeyac' 'ayn an Dios in tic, to caw niwn wel'chi.

¹⁵ Alc e b'a 'ayin yic 'ay e somc'ojlal, an 'oj ex in colo'. 'Ay cab' wel'ch 'a e sat, xchi Dios.

¹⁶ Palta ax eb' maysch'olnil sb'eyb'al, tzyal Dios 'a eb' 'ixtic: ¿Tom 'ay eyaln eyic eyaln 'el in cuynb'il, yet' eyaln 'el yab'xil in trato?

¹⁷ 'In matz yal e c'ojl tzex wa' cuenta, may pax yel'ch in paxti 'ayex.

¹⁸ A yic tzeyiln junc 'elc'um, ax tic caw tzex tzalj e 'at yet'oc; jun tzex 'ec' pax yet' eb' tzb'on 'ajmulal.

¹⁹ Cojxn̈ej tu paxti'al tzeyala, tze na chan̈ eya'n 'es.

²⁰ Tzc'ac'b' 'och e c'ojl 'a eyit 'anma'il. Tze nachan̈ e b'on tas tu 'a eb' eyu'tac to junn̈j e nun yet'oc.

²¹ Atn smasnil e mul tic, an xo ton̈j tzin 'och q'ueln 'ayex. Am wal e nani to lajn in eyet'oc. Q'uelc'mb'a 'oj waj eyet'oc, ax waln 'och e mul 'a e sat.

²² Toto tzin 'at satc'ojlal eyu'uj, wach' cab' tz'aj snachj 'el eyu'uj, to choc' 'oj ex wutc cani. Man̈x 'a mach 'oj e coln 'el 'ayin.

²³ A eb' tz'a'n yuj diosal 'ayin, 'ay wel'ch 'a sat eb'. A eb' tzb'eylb'an in b'eyb'al, 'oj in colcn 'el eb', xchi Dios.