Salmos 5 - Chuj San Sebastian Bible

SALMO 5 Tzc'anx scolwal Dios

Sb'it David jun tic tzc'an junc mach tzjucb'tzan b'it yet' 'amay

^1-2 Mamin Jehová in Reyl ach, in Diosal ach, tzcham wal a maclni in paxti 'oj wal 'ayach. 'O'ch cab' a c'ojl 'ayin yic si'sni sjaw in c'ojol. Tzcham wal a maclni ab'i', yic tzwaln in b'a 'ayach, yujto a 'aych tzin leslwi.

³ A 'a yic sq'uin̈b'ial, 'oj ab' wawj 'ayach; yic caw sq'uin̈b'ilto ax waln in b'a 'ayach, ax in tan̈wni a pacn 'ayin.

⁴ Yujto Dios ach, matz ach tzalj yet' eb' tzb'on maysch'olnil; a eb' tu sb'eyb'al, matz tac' sc'och eb' 'a a tz'ey.

⁵ A eb' b'an̈quintac, ma'oj stac' sc'och eb' 'a ojltac. Ach tic tza chacl eb' tzb'on maysch'olnil.

⁶ Mamin Jehová tza satl eb' 'a'm 'es, eb' milm 'anma', yet' pax eb' tzcomn nan chan̈ junc paxti'.

⁷ Palta an xo tic, yuj wal a niwn chamc'ojlal 'ayin, 'oj stac' in c'och 'a atut; 'oj wal in b'a 'aych 'a 'emmquilal 'a atut cha.

⁸ Mamin Jehová, yuj wal eb' 'ajc'ojl yajch 'ayin, yuj cha, quetzn b'ey et' wal 'a stojlal. A wal 'a junc b'e caw wach', ata tzin ej 'ati.

⁹ ¿Tom 'ay paxti yel tzlaj yal eb'? An̈j tas tu tzna eb'. Yuj tas tzyal eb' cha, yuj chi tz'atcn eb' 'anma 'a chamel. Tzyal eb' wach' paxti 'a chab'satil.

¹⁰ 'Ac' syailal eb' ach in Diosal; 'ac' telwc 'ejm eb' yuj stu nab'enal tzlaj sb'o'. Yel xo wal tz'ec' eb' 'a yib'n̈ sb'on maysch'olnil. Yuj cha, 'ij 'el eb' 'a scal eb' a chon̈ab', yujto xmeltzj pax 'och eb' 'ajc'ojlal 'ayach.

¹¹ Palta ax smasnil eb' tzach 'a'n 'och yipc sc'ojol, 'ac' stzaljc'ojlal eb'. Ya'l cab' eb' yaw ach sb'itnan yet' stzaljc'ojlal 'a smasnil tiempo, yujto ach tza tan̈wj eb'. A eb' tzach chamc'ojlani, a 'aych tzyij eb' stzaljc'ojlal.

¹² Mamin Jehová, 'ac' a yaxilal 'a eb' tojl tzyutj sb'a; tza coln eb' yet' a wach'c'ojlal.