Salmos 49 - Chuj San Sebastian Bible

SALMO 49 A q'uen tumin,*r* matz tac' smann q'uen qui q'uinal

Sb'it eb' yin̈tl Coré jun tic tzc'anlb'ej junc mach tzjucb'tzan b'it

¹ Tzcham wal eyab'n jun tic ex wit chon̈ab', ex to cajn ex 'a smasnil chon̈b' 'ay 'a yolyib'n̈q'uinl tic;

² 'ab'c ex rico yet' ex meb'a', ex to 'ay eyel'chi yet' ex to may eyel'chi.

³ 'Oj in paxtin yet' jelnal, 'oj wal jun tzo'n̈ nab'en to caw ya snachj 'el eyu'uj.

⁴ 'Oj in maclc wab' tas wach', ax waln 'el jun tzo'n̈ tas 'a c'ultacl yet' sb'itl arpa.

⁵ ¿Tas yuj 'oj in xiwi, yic 'oj jawc jun tzo'n̈ tiempo maysch'olnil 'a wib'n̈ yuj smaysch'olnilal eb' tzchichn 'och 'ayin?

⁶ A eb' tzya'ch sricoal yipc sc'ojol, caw tzyij chan̈ sb'a eb' yet'oc, yujto niwn tas 'ay 'a eb'.

⁷ Palta may junc on̈ 'oj stac' qui colnec 'el qui b'a qui ch'ocoj, ma'oj stac' pax qui mannec qui q'uinl 'a Dios.

^8-9 Ma'oj techjoc smann q'uen tumn qui q'uinlec, sec pitzn on̈c 'a jun 'ejmn̈ej, yic matz on̈ chamec, yujto caw chan̈ stojl qui q'uinlec cha.

¹⁰ 'In tzquilec to jun lajnn̈ej scham eb' 'anma smasnil, tzcham eb' jelan, tzcham pax eb' 'emnc sc'ojlani, ax sricoal eb', chucx mach 'aj tzcani.

¹¹ Wach'xam niwn lum lu'um tzman eb' yico'oc, palta nab'an̈ej. A 'aj mucn eb', ata 'ayc'n̈ej eb' 'a jun 'ejmn̈ej. Smasnil tiempo 'oj can eb' ta'

¹² An̈ 'anman̈ec tic chamlb'a cajec, wach'xam caw rico on̈ec, palta lajnn̈ej 'oj cajc qui cham 'icha tz'aj scham no noc'.

¹³ 'Ixta 'oj 'aj sat 'ejm eb' tzyal wach'l sb'a, ax cob' tas 'aych yipc sc'ojl eb', 'oj can yuj eb'.

¹⁴ A 'a jun tzo'n̈ 'anma cha, a chamel 'a chi 'aych yilmalc eb'. A jun chi tz'i'n 'at eb' 'a campusan, 'icha tz'aj junc calnelu tz'ijx 'at 'a 'aj tzchami. Ax 'a yic 'oj sacb'c 'eli, a eb' wach' snab'en, a eb' 'oj 'a'nc ganar 'a yib'n̈ eb' cha. Jab'jnal 'oj sat 'ejm sniwnal eb', ax lum campusan cha, a chi 'oj 'och yatutoc eb'.

¹⁵ Palta an xo tic, a Dios 'oj wi'n 'el 'a yol sc'ab' chamel, ax in yi'n 'at yet'oc.

¹⁶ Toto 'ay eb' tz'och ricoal tzquila, matz on̈ 'och 'il yuj eb', wach'xam tzniwtj sricoal eb' chi 'a yatut,

¹⁷ palta a yic 'oj cham eb', toxn may jac wach' chi 'oj yic' eb' yet'oc. Sch'ocj xoj eb' 'oj 'at mucxoc 'a campusan cha.

¹⁸ Wach'xam caw tzaljc'ojlal yaj eb' 'a yic pitzn to eb', tzlaj alx wach' paxti 'a eb' yuj eb' yit 'anma'il, yujto caw 'ay tas 'ay 'a eb',

¹⁹ palta a yic 'oj c'och sc'ul scham eb', 'oj chamn̈j eb' 'icha 'ajn̈c scham eb' smam yichm eb'. Man̈x 'a b'a'n̈ 'oj yilx eb' sacq'uinl jun 'ejm xo.

²⁰ An̈ 'anman̈ec tic, wach'xam caw rico on̈ec, toto matz nachj 'el cujec, lajnn̈ej 'oj cajc qui cham 'icha tz'aj scham no noc'.