Salmos 48 - Chuj San Sebastian Bible

SALMO 48 Swach'l yilx Sión atn schon̈b' Dios

Sb'it eb' yin̈tl Coré jun tic

¹ A Jehová caw wal niwn yel'chi. A qui Diosalec smoj wal yalx wach' paxti 'a 'a, 'a yol chon̈ab' yet' 'a lum tzaln to yicn̈ej yaji.

² Caw wal wach' yilx lum tzaln Sión, yujto caw chan̈ yaj chan̈ lu'um. A 'a stojlal norte, ata 'ay lum schon̈b' jun Rey caw wal niwn yel'chi.

³ 'Ayc' Dios 'a yol sdespacho, 'ix yac' 'ojcaxc 'eli to cojn 'aj wach' qui colnec qui b'a.

⁴ 'Ix laj syam sb'a eb' rey 'ayc' 'a smasnil yolyib'n̈q'uinal, yic tz'at cob' ya'nc eb' owl 'a chon̈b' Sión.

⁵ Palta a yic xyiln eb' jun chon̈b' cha, caw sat sc'ojl eb' yilni, xlaj somchj chan̈ eb', x'at eb' 'eloc.

⁶ 'Ix 'och eb' 'a xiwc'ojlal, xlaj somchjc chan̈ eb'. 'Icha tz'aj junc 'ix yab'n syail yic tz'alj yune', 'ixta x'aj eb' yab'n syail.

⁷ 'Ix satl eb' 'icha tz'aj te barco yic Tarsis spoj yuj junc niwquil 'ic'.

⁸ A 'a schon̈b' qui Diosalec, ata quiljnaquec yet' qui sat, atn Jehová tztac' yuj smasnil. 'Icha wal x'aj yalx 'ayn̈ec, 'ixta wal xcutjec quilni. A Dios 'oj 'a'nc ste'nal schon̈b' Jerusalén chi 'a smasnil tiempo.

⁹ Ach qui Diosal on̈, tzqui na cot wal a niwquil chamc'ojlal 'ayn̈ 'a atut.

¹⁰ Alx cab' wach' paxti 'aych 'a smasnil yolyib'n̈q'uinl tic, yujto a moj wal yijx chan̈ a b'i. Yet' wal a jelnal tza b'on yaj smasnil tas 'a stojlal.

¹¹ Tzalj cab' chan̈ eb' 'anma 'ay 'a tzaln Sión. Q'uib' cab' stzaljc'ojlal eb' 'anma 'ay 'a yol yic Judá, yujto tojl tzyutj Dios sb'eyc'ojlwi.

¹² 'E'n̈ec oyyoc 'a spatquil Sión, tze b'isni jaye storreal 'ay;

¹³ tzcham wal eyoch q'ueln 'a smuroal yet' 'a sdespachoal, sec wach' 'oj stac' eyaln yab'xil 'a eb' 'unn tot 'oj 'aljoc.

¹⁴ A sDiosal Sión, atn qui Diosalec 'a jun 'ejmn̈ej. A tzon̈ 'i'nec b'ey 'a smasnil tiempo, masnto 'a slajub'.