Salmos 47 - Chuj San Sebastian Bible

SALMO 47 A Dios Rey 'a yib'n̈ smasnil

Sb'it eb' yin̈tl Coré jun tic tzc'anlb'ej junc mach tzjucb'tzan b'it

¹ E masnil ex wit chon̈ab', qui po'c qui c'ab'. Calc qui b'a 'a tzaljc'ojlal 'a Dios.

² Yujto a Jehová caw niwn yel'chi, 'ay pax smay; Yajl yaj 'a yib'n̈ smasnil lum lum tic.

³ A 'ix 'a'n jun tzo'n̈ chon̈b' 'a yol qui c'ab'ec, 'ix can jun tzo'n̈ nacion̈ 'a yaln̈ cujec.

⁴ A si'lni qui macl lumec, atn lum 'ajtil cajn on̈ 'ec' an̈ yin̈tl on̈c Jacob tic, atn jun chamc'ojlb'il yu'uj.

⁵ A Dios 'ix q'ue 'a 'aj 'ay sdespacho 'a scal 'aw yic tzaljc'ojlal, 'aj tz'utz'x strompeta.

⁶ B'itn coyec, caw wal b'itn coyc 'a Dios. B'itn coyc 'a qui Reyal.

⁷ A Dios rey yaj 'a yib'n̈ smasnil lum lum tic. B'itn coyc yet' qui wach' paxti 'a 'a.

⁸ A Dios 'aych yajlil 'a yib'n̈ junjn nacion̈. Wocn 'ec' 'a sdespacho to cojn 'ay yico'.

⁹ 'Ix laj syam sb'a eb' 'anma niwn yel'ch 'a junjn chon̈ab'. 'Ix 'och eb' qui tz'acb'oc an̈ schon̈b' on̈c tic, atn sDiosal qui mam 'ichm Abraham.

¹⁰ Cojn Dios 'ay yic eb' yajl 'ay 'a yolyib'n̈q'uinl tic. Cojxn̈ej 'ec'b'al yel'ch 'a yib'n̈ smasnil.