Salmos 45 - Chuj San Sebastian Bible

SALMO 45 B'it yic snupnel win rey

Sb'it eb' yin̈tl Coré tic tzc'anx yuj junc mach tzjucb'tzan b'it yic nupnel

¹ 'Ay wal paxti caw wach' 'ayc' 'a in nab'en. A chi tzin c'anlb'ej yic tzwaln in wach' paxti 'a win rey. A 'in paxti', lajn 'icha spaxti junc mach jeln stz'ib'ni.

² Ach rey, cojn ach yel xo wach' 'elx 'a yib'n̈ smasnil eb' winac. Man̈x jantcoc wach' paxti tzala, yujto 'ix yac' Dios syaxilal 'a eb'n̈ 'a jun 'ejmn̈ej.

³ Jalch espada 'a a nan̈al, ach to jeln a'n owal, yujto a tzch'oxn 'eli chajtlto niwn el'ch yet' opiso.

⁴ Q'uen̈ 'a yib'n̈ a chej yet' a poder yic tza'n ganar owal yuj swach'loc paxti caw yel. Yet' wal stojlal tza b'onyaj eb' 'anma 'emmquilal yeq'ui. 'Ay cab' smay tas 'oj a b'o yet' a poder cha.

⁵ A 'a jul-lab' caw jay sn̈i', tz'at tz'ab'njoc 'a yol sc'ojl eb' 'ajc'ojl yajch 'ayach. Yuj cha, 'oj telwc 'ejm eb' chon̈b' 'a ojltac mamin rey.

⁶ Ach in Diosal Reych 'a smasnil tiempo. Ach tic 'aych 'och Yajlil, caw tojln̈ej tzotj a b'eyc'ojlwi.

⁷ A jun tojl nab'enal, caw wach' 'a a sat, ax jun tzo'n̈ tas maysch'olnil, caw yajb'il o'oj. Yuj cha, a Dios, atn a Diosal 'ix ya' jun niwn tzaljc'ojlal 'ayach. Yel xo niwn a tzaljc'ojlal 'ay 'a yib'n̈ eb' ajun et'oc.

⁸ Smasnil a pichul, caw tz'ec' sjab' yet' sperjumail te mirra, te áloe, yet' yic te canela. A son 'aych sch'an̈il a tz'a'n tzaljc'ojlal 'aych 'a atut 'aj tzac' yajlil, jun to nab'a marfil 'aych yelwnub'loc.

⁹ 'Ay eb' 'ix yisl ewin rey 'ayc' 'a 'aj tz'och eyamnil. A 'a stojlal a wach' c'ab' 'a a despacho, ata 'ayc' 'ix reina. A q'uen oro yel xo wal caw wach' a 'aych 'a 'ix.

¹⁰ 'Ab'xnan̈ ach cob's 'ix, tzcham wal a maclni tas 'oj wal 'ayach. Man̈ a na cot eb' a mam a nun, yet' eb' et chon̈ab'.

¹¹ Yujto a win rey tznib'n 'och swach'l elxi. A win ajlil tz'aji, yuj cha, yiclum tzotj a b'a 'a winac.

¹² A eb' 'aj Tiro, 'oj yac' eb' siylab' 'ayach. Ax eb' niwc rico 'a yol chon̈ab', 'oj snib'c eb' 'oj 'och 'a junc'ojlal et'oc.

¹³ Tic tzjaw 'ix cob's 'ix tznupn yet' win rey, 'ix yisl junx win rey. Caw wach' yilx 'ix yet' spichul, 'aych oro 'a stitc spichl 'ix.

¹⁴ Wach'x yaj 'ix sb'o yet' spichul, 'ijx cab' 'at 'ix 'a win rey cha. Tza'n 'och jun tzo'n̈ eb' 'ix cob'stac 'ix yitb'eymoc 'ix, atn eb' 'ix swach'c'ojl 'ix.

¹⁵ Caw wal tzaljc'ojlal yic eb', tzalj eb' sc'och 'a sdespacho win rey cha.

¹⁶ A wal eb' onnal ach rey, a eb' 'oj 'em wocn 'a sdespacho can eb' a mam echam, ax a'n 'och eb' yajlil 'a yib'n̈ smasnil a macb'en.

¹⁷ An xo 'oj wac' naxoc cot a b'i yuj smasnil eb' 'anma tot 'oj 'aljoc 'a yolyib'n̈q'uinl tic, ax smasnil eb' 'anma', 'oj yi' chan̈ eb' a b'i, 'oj yal eb' wach' paxti 'aych 'a smasnil tiempo.