Salmos 44 - Chuj San Sebastian Bible

SALMO 44 Lesl yic tzc'anx scolwal Dios

Sb'it eb' yin̈tl Coré jun tic tzc'an junc mach tzjucb'tzan b'it

¹ Ach qui Diosal on̈, 'ix cab' wal yet' qui chicn on̈, 'ix yaln pax eb' qui mam quichm 'ayn̈ on̈, yuj tas 'ix a b'o yet' eb' 'a yic pecti'.

² Yet' a poder 'ix a pechn can 'el eb' chuc chon̈b'al 'a slu'um. 'Ix a satn can 'el jun tzo'n̈ niwc chon̈b' cha. Ax eb' qui mam quichm on̈, a eb' 'ix ac' cajnc jun lugar tic.

³ Yujto man̈oc yet' yip eb', man̈oc pax yespada eb' xya'lb'ej yic xyi'n can eb' jun lum tic. Man̈ yujoc sjelnal eb' ya'n owal, palta yuj a tojlal yet' a poder, yujto 'ay a chamc'ojlal 'a eb' qui mam quichm chi 'on̈.

⁴ Ach qui Diosal on̈, caw yel qui Reyl ach on̈. Ach tzac' cac' ganar an̈ a chon̈b' on̈ tic on̈.

⁵ O'oj 'ix ca'n ganar yem eb' 'ajc'ojl yajch 'ayn̈ on̈, yet' wal a b'i 'ix ca'n telwc eb' tznib'n tas tzlaj on̈ yutc on̈.

⁶ Man̈oc qui jul-lab' tic 'oj ca'ch yipc qui c'ojl on̈, man̈ yujoc pax quespada tic on̈ ax ca'n ganar owl on̈.

⁷ Ach on̈ a col 'a yol sc'ab' eb' 'ajc'ojl yajch 'ayn̈ on̈, 'ix ac' pax q'uixwc 'el eb' tzchichn 'och 'ayn̈ on̈.

⁸ Cojn wal 'aych 'oj cac' tzaljoc qui c'ojl 'a smasnil tiempo on̈, 'oj ach qui b'itnoc 'a junjn c'u.

⁹ On̈ a patquilj can 'eli, on̈ 'a'cn 'at 'a scal q'uixwc'ojlal. Man̈x 'ic ach colwj yet' eb' qui soldado on̈.

¹⁰ Ach on̈ ac' 'at 'elc 'a eb' 'ajc'ojl yajch 'ayn̈ on̈. Ax eb' tzchichn 'och 'ayn̈ on̈, tzlaj yelc' eb' tas 'ay 'ayn̈ on̈.

¹¹ On̈ ac' 'a yol sc'ab' eb' on̈, 'icha junc calnelu tz'ijx 'at 'a 'aj tzchami. On̈ laj sactzic can 'at 'a scal eb' chuc nacion̈al.

¹² Nab'an̈ej xcob' on̈ a chon̈cn 'el an̈ 'a chon̈b' on̈ tic, toc niwn jac qui tojl xa cha'aj.

¹³ On̈ a'cn 'och b'uchnb'ilal 'a eb' 'anma cajn 'a qui tz'ey on̈. Caw tzon̈ stzuntzj eb' on̈, may jac quel'ch 'a sat eb' on̈.

¹⁴ On̈ a'cn wal 'och b'uchnb'ilc paxti 'a scal eb' chuc chon̈b'al, a yic tzlaj on̈ yiln eb' on̈, tzlaj syucn eb' sjolom yet' sc'ab' yic tzon̈ sb'uchn eb' on̈.

¹⁵ May jun 'ejmoc wach' quic on̈, chijn on̈ 'ejmi tzon̈ 'ec' yuj q'uixwc'ojlal.

¹⁶ Smulyujoc eb' 'ajc'ojl yajch 'ayn̈ on̈, 'ixta quec' on̈. Tznib'j wal eb' yac' spac 'ayn̈ on̈, tzon̈ stzuntzj eb' on̈, may jac quel'ch 'a sat eb' on̈.

¹⁷ Atn wal smasnil jun tzo'n̈ tic 'ix 'ec' 'a quib'n̈ on̈, wach'xam ma'ach cac' sat 'a qui c'ojl on̈. May pax 'ajtil to man̈ yiclumoc xcutj qui b'a 'a a trato on̈.

¹⁸ May 'ajtil 'ix qui na ach cactn can on̈, may pax 'ajtil 'ix cactj can a cuynb'il on̈.

¹⁹ Wach'xam 'ixta', palta ach on̈ a'cn 'at 'a scal no noc' 'ay smay, on̈ a macn can pax 'ejm 'a scal q'uic'q'uinl yic chamel.

²⁰ Ach qui Diosal on̈, q'uinloc 'ix cac' sat qui c'ojl 'aych on̈, ax 'a junc comn dios 'aj 'ix cac' 'ejm qui b'a on̈,

²¹ toto 'ixta', ¿toc am ma'on̈ el coti? ¿toc 'ay junc tas c'ultac yaj to man̈ ojcoc?

²² Palta oj wali, yuj cha, junjn c'u 'ijn tzon̈ smil cham eb' on̈, 'icha no calnelu tz'ijx 'at chamoc, 'ixta tzon̈ yutj eb' on̈.

²³ Mamin, ¿tas wal yuj 'icha to wayn̈c ach? 'Ilt on̈ coti, man̈ on̈ a patquil can 'el 'a jun 'ejmn̈ej on̈.

²⁴ ¿Tas yuj tza c'ub'j 'el a b'a? ¿Tas yuj tzac' sat a c'ojl 'ayn̈ 'a scal qui yailal on̈?

²⁵ Man̈x 'a yip qui pixn on̈, tox on̈ telw 'ejmi, toxn̈ej t'octac yaj qui niwnal 'a sat lum on̈.

²⁶ Cotn̈ colwjoc quet' muc'uc. Yuj a niwn chamc'ojlal, cotn̈ colwjoc 'ayn̈ on̈.