Salmos 41 - Chuj San Sebastian Bible

SALMO 41 A slesl jun 'anma ya'ay

Sb'it David jun tic tzc'an junc mach tzjucb'tzan b'it

¹ Wach' yic eb' tznan eb' meb'a', yujto a Jehová a 'oj colnc 'el eb' 'a yic stiempoal 'ay yailal.

² A 'oj tan̈wnoc eb', 'oj yac' sq'uinl eb', ax ya'n pax stzaljc'ojlal eb' 'a sat lum lum tic. Caw wach' yic eb', ma'oj 'ajxoc eb' 'a yol sc'ab' eb' 'ajc'ojl yajch 'a eb'.

³ A 'oj 'a'nc b'oxc sc'ojl eb' 'a scal syailal; ax smeltzj 'och syailal eb' chi swach'loc.

⁴ 'Ix waln 'ixtic: Mamin Jehová, 'o'ch cab' a c'ojl 'ayin; 'ac' b'oxc in c'ojol, wach'xam x'och in mul 'ayach, xin chi.

⁵ A eb' 'ajc'ojl yajch 'ayin, caw tu tzyal eb' 'a in patic; tzyaln eb' 'ixtic: ¿B'a'n̈ wal 'oj chamoc, sec man̈x 'a mach 'oj nanc coti? xchi eb'.

⁶ Tzwulc eb' in yila', palta man̈ yet'c smasnil sc'ojl eb'. Ton̈j tzlaj wul smaclc eb' in yila', ax yic tzpaxx eb' 'a yol b'e, tzlaj yalnc can 'el eb' in peclal.

⁷ A eb' matz in nib'ni tzyam sb'a eb' smasnil, tzlaj yalnc eb' wuj 'ixtic:

⁸ A jun 'anma tic, caw 'ayx sjab' yuj jun syailal tic, man̈x 'a yan̈il. Tox 'ix telw can 'a sat sch'at, man̈x 'oj jawc pax sc'ojol, xchi eb'.

⁹ Ax jun in wach'c'ojl caw 'aych cob' yipc in c'ojol, junn̈j tzin wa yet'oc, palta 'ix meltzj 'och 'ajc'ojlal 'ayin.

¹⁰ Mamin Jehová, 'o'ch cab' wal a c'ojl 'ayin, 'ac' jawc pax in c'ojol, ax wa'n in pac 'a eb' 'ajc'ojl cha.

¹¹ 'Ixta 'oj 'aj snachj 'el wu'uj, chajtlto xin b'o 'icha tas tza nib'ej, yujto a eb' 'ajc'ojl yajch 'ayin, ma'ix tzalj eb'.

¹² An xo pax tic, wach'n̈j xwutj in b'a 'a ojltac. Quetzn chan̈ Mamin, 'aynn̈ej cab' 'ec' et'oc.

¹³ ¡Alx cab' wach' paxti 'a Jehová, atn qui Diosal an̈ israel on̈c tic, ticnec yet' 'a smasnil tiempo! 'Ixta cab' tz'aji.