Salmos 4 - Chuj San Sebastian Bible

SALMO 4 'Aych Jehová yipc qui c'ojol

Sb'it David jun tic, tzc'an junc mach tzjucb'tzan b'it yet' jun tzo'n̈ yamc'ab' ch'an̈ 'aych 'a 'a

¹ Ach in Diosal, ach tzin a b'oyaj 'a stojlal, ta'wj in yic tzin 'awj 'ayach. A yic ya waji, ach xo in ac' b'oxoc. 'O'ch cab' wal a c'ojl 'ayn ticnec, tzab'n in lesl tic.

² Ex wit 'anma'il, ¿b'a'n̈ wal 'oj eyactc eyaln in peclal? ¿B'a'n̈ wal 'oj eyactc can eyaln paxti to may yel'chi?

³ 'Ojquejec 'eli to a Jehová a 'ix si'n 'elt eb' 'aych snab'en 'a 'a, yic tz'och eb' yico'oc; a yic tzin 'awji, tzin sta'wjn̈ej.

⁴ 'Ib'xan̈c chan̈ yuj xiwlal, man̈x cab' pax 'och e mul. A yic c'otnexx 'eq'ui, 'a yic sictac eyaji, tze b'eyc'ojlan e b'a.

⁵ 'A'c 'och yipc e c'ojl Jehová. A xajmb'al to smoj tzeyac'a, a tzeyac' 'a 'a.

⁶ Til wal eb' tzaln 'ixtic: Comnoc 'ay mach tzch'oxn quil wach'l cha, xchi eb'. Mamin Jehová, ch'ox quil a wach'l chi 'on̈.

⁷ Ach 'ix ac' in tzaljc'ojlal, yel xo wal niwn yel'ch 'a yib'n̈ yic eb' caw niwn sat yawb'en tzmolo.

⁸ Mamin Jehová, a yic tzin 'ec' c'otan, tzaljc'ojlal tzcot in wayan̈, yujto ach 'aychn̈ej 'och wet'oc, yuj cha, may tas tzin 'i'ni.