Salmos 39 - Chuj San Sebastian Bible

SALMO 39 An̈ 'anman̈ec, caw jab' wal qui q'uinlec

Sb'it David jun tic tzc'an Jedutún yic tzjucb'tzan b'it

¹ An tic, tox xwala to tzin tan̈wj in b'a yet' in b'eyb'al, sec wach' matz 'och in mul yuj tas tzwala. 'Oj in tan̈wc in b'a 'a tas tzwala, ya' sb'a 'ayc' eb' 'anma tu sb'eyb'al 'a wojltac.

² Sictac in 'aji, wach'xam junc tas wach' may xon tas xwala. Ax in cusc'ojlal, 'ix wach' niwtj cha'an̈.

³ 'Icha wal to 'ix n̈ilchj chan̈ c'ac' 'a sn̈i in c'ojl xwab'i. A yic tzin nab'tan̈n cha, 'ix wach' niwtj jun c'ac' chi xwab'i. 'Ixta to b'i'an, caw 'ip in 'awj cha'an̈.

⁴ Mamin Jehová, 'ac' wojcoc 'eli tas slajb' wico', jantcto tiempo 'ayn 'eq'ui. Tzin nib'j tzwojquej 'eli, jantcto wal jacx in q'uinal.

⁵ Caw wal c'ochn 'ix otj can in q'uinal, 'icha to may jac yel'ch 'a a sat. Yel ton b'i'an, qui masnil an̈ 'anman̈ tic on̈, caw may yel'ch jab' qui q'uinl tic on̈.

⁶ An̈ 'anman̈ tic, lajn yec' qui q'uinl 'icha wewen. Nab'an̈ej tzquixtj qui b'a qui molb'tzan qui ricoal, ax tz'aji, chucx mach 'oj lajnoc.

⁷ Ax ticnec Mamin, ¿tas wach' tzin tan̈wej? Cojxn̈ej ach 'aych 'och yipc in c'ojol.

⁸ Coln 'el 'a yaln̈ smasnil in mul, man̈ in a cha b'uchxoc yuj eb' tu snab'en.

⁹ 'Icha to matz tac' in paxtini, 'ixta xwutj in b'a, may tas xwala, yujto ach xa'ch jun tzo'n̈ yailal tic 'ayin.

¹⁰ 'Ijcan 'el in yailal 'ix a'chi, yujto wan in lajw 'ejm tzwab' yu'uj.

¹¹ Ach tzon̈ a cuy on̈, tza'n 'och qui yailal yuj qui mul on̈, 'icha to 'ijctac xo tzotjcan tas yel xo tzqui chamc'ojlej on̈. Qui masnil on̈, caw may yel'ch yec' qui q'uinal, lajn 'icha qui'n quic' jun 'ejmoc.

¹² Mamin Jehová, 'ab' wal in lesal, 'a' cot wal a chicn 'ayin yic tzwaln in b'a 'ayach. Man̈ ton̈joc tzach 'och q'ueln 'ayin yic tz'el yal in sat, yujto 'e'lb'a wec' 'a a sat, 'icha 'e'nc eb' in mam wicham.

¹³ 'Ij 'el a c'a'lc'ojlal 'a wib'an̈, 'ac' jacx in tzaljc'ojlal ya' sb'a mantzac in chami.