Salmos 38 - Chuj San Sebastian Bible

SALMO 38 Lesl yuj sc'anx scolwal Dios

A jun tic sb'it David yic tzc'ann junc tas 'a Dios

¹ Mamin Jehová, man̈ in ac' cuenta yet' yowl a c'ojol, man̈ a'ch in yail yet' a c'a'lc'ojlal.

² Yujto 'ix 'och tz'apnjoc a jul-lab' 'ayin; 'ix a quil 'emt pax a c'ab' 'a wib'an̈.

³ Yuj wal yowl a c'ojl 'a wib'an̈, yuj cha, smasnil in niwnal tic, caw ya yaji, may junc in b'acl wach', yujto 'ay in mul.

⁴ A in maysch'olnilal cha, a quiln q'ue 'a wib'an̈, 'icha wal junc niwquil 'ictz matz techj yal-l wu'uj.

⁵ Yuj wal in pital, yuj cha, lajwnac in, wan in c'a'i, 'ayx in jab'.

⁶ Ñojn xoj waji tzin b'eyi, man̈x 'a tas tz'el walni, caw cusc'ojlal waj 'a smasnil tiempo.

⁷ Til wal schiwj yich in patc yuj c'a'l yab'il, yaxn̈ej yoch 'a smasnil in niwnal.

⁸ Caw choc' yaj in niwnal, man̈x 'a pax wip; tzin c'acw wab'n syail.

⁹ Mamin, a wal yic si'sni sjaw in c'ojol, ojc wal smasnil tas tzin nib'ej, c'uxn tzel smasnil, may tas c'ultac yaj 'ayach.

¹⁰ Caw wal tz'ib'x chan̈ in pixan, caw c'uxmtac yel wip, an̈jtona', x'och pax 'a in sat.

¹¹ Ax eb' in wach'c'ojol yet' eb' jun waj yet'oc, c'uxn xlaj 'el eb' 'a in tz'ey, yujto caw xniwtj in yailal.

¹² A eb' tzin nib'n milnc chamoc, tzlaj yac' 'ejm eb' yal 'a wojltac. A eb' tznib'n juwc 'el in nab'en, tzlaj b'ey sti eb' 'a in patic, sec tzin juw can 'el yuj eb'. Junjn c'u tzsayn eb' tas tzin yutej.

¹³ Palta an xo tic, matz wab' tas tzyal eb', 'icha to macn in chiquin; 'icha pax to matz tac' in paxtini, may tas tzwala.

¹⁴ Lajn in 'icha junc mach matz yab'i, matz tac' xon yaln sb'a, yic tzcoln sb'a 'a junc tas.

¹⁵ Mamin Jehová, cojn ach tzach wa'ch yipc in c'ojol; in Diosal ach, 'oj in a ta'woc.

¹⁶ Cojn jun tas tzwala, comnoc matz in stzetzj eb' 'ajc'ojl cha, may cab' eb' tzyij chan̈ sb'a yic tzin telw 'ejmi.

¹⁷ Palta jab'xoj in telw 'ejm tzwab'i, man̈xtzac 'och wan jac in yailal tic.

¹⁸ Yuj cha, 'oj wal q'uet in mul, yujto somchjnacn yuj in mul cha.

¹⁹ A eb' 'ajc'ojl yajch 'ayin, pitzn eb', 'ay pax yip eb'. Caw tzniwtj pax sb'isl eb' matz in nib'n 'ilnoc, wach'xam may in mul 'a eb'.

²⁰ A tas wach' tzwutj 'a eb', tu tzyutj eb' spacn 'ayin; tzlaj 'och eb' 'ajc'ojlal 'ayin, yujto wach' tzwutj in b'eyb'al.

²¹ Mamin Jehová, ach in Diosal, man̈ in actc can in ch'ocoj. Man̈ e'l a b'a 'a in tz'ey.

²² Mamin, ach in Colmal, cotn̈ mu'c wul in a colo'.