Salmos 36 - Chuj San Sebastian Bible

SALMO 36 A smaysch'olnilal eb' 'anma',*r* yet' swach'c'ojlal Dios

Sb'it David jun tic, win schecb' Jehová yic tzc'anlb'an junc mach tzjucb'tzan b'it

¹ A maysch'olnil, a tzjucb'tzan eb' 'anma maysch'olnil sb'eyb'al, toxn may yel'ch Dios 'a sat eb'.

² Tzyalch sb'a eb' wach'il, man̈ 'ojcab'ilc smul eb' chi snani; palta matz yactj eb' sayn smuloc.

³ Cojxn̈ej tu paxti'al tzyal eb', tzlaj ya'nc eb' 'es, tzyactn can eb' tas tojol, man̈xtzac snib'j eb' sb'o tas wach'.

⁴ A yic teln 'ec' eb' 'a sat sch'at, cojn maysch'olnil tzna eb'; mitz'tz'i yec' snab'en eb' sb'on tas tu'. Matz yal sc'ojl eb' tzyij 'el sb'a 'a maysch'olnil.

A swach'c'ojlal Dios

⁵ Ach xo Mamin Jehová, caw tzc'och a chamc'ojlal 'a satcha'an̈; ax a wach'il, may slajub'.

⁶ Caw wal tojl a nab'en, lajn wal 'icha lum niwc witz, ax a b'eyc'ojlal, lajn yaj 'icha a mar caw xab' yich. Ach tza tan̈wj eb' 'anma', yet' pax no noc'.

⁷ Ach in Diosal, man̈x jantcoc satjub'tacl yilx a chamc'ojlal, yuj cha, a 'aych tzqui col qui b'a on̈, 'icha no cotc caxtiln̈ tzcol sb'a 'a yaln̈ sc'axl snun.

⁸ Ach tzac' tas tzqui c'ux on̈, tza'n cuc' a a caw wach', caw wal tzon̈ b'ut'j si'mb'il on̈.

⁹ Yujto a 'aych tzcot qui q'uinl on̈, 'icha sjaj junc a a', yujn̈ej a sacq'uinlal 'ay qui q'uinl on̈.

¹⁰ 'Ay cab' a chamc'ojlal yet' a tojlal 'ayn̈ an̈ 'ojtnac ach, atn an̈ wach' qui nab'en 'a ojltac.

¹¹ Man̈ a cha jawc eb' b'an̈quintac 'a in tz'ey; an̈jtona eb' maysch'olnil, man̈ a cha in xib'tc eb'.

¹² Ex wit chon̈ab', 'iltec wal 'aj tzlajw can 'ejm eb' tzb'on maysch'olnil. Tzlajw can 'ejm eb', sec wach' man̈x 'a b'a'n̈ 'oj q'ue wan eb'.